لغة حب جديدة خلقها جيل Z والمعروف بجيل الإنترنت صحينا الصبح لقيناها مع مصطلحات زي الـ Ghosting والـ”توكسيك”، فبعد ما كانت جملة “ابعت لي أغنية بتفكرك بيا” أو لو رجعنا شوية كان اسمها “ابعت لي جواب”، هي لغة التعبير عن الحب، دلوقتي لغة التعبير عن المشاعر والامتنان بقت متمثلة في ابعت لي “ريلز” والمعروفة بالمقاطع الصغيرة اللي بنبعتها لبعض من وسائل التواصل الاجتماعي.
وده بعد ما تأكدت دراسة من جامعة بنسلفانيا وشبهت الموضوع بالـ “pebbling” المعروف عند طيور البطريق، طب وطيور البطريق بتعمل إيه؟ بتسيب حصى في أعشاش شريكها أو جوزها كنوع من أنواع التعبير عن المودة والحب.
واتحول ده على مواقع التواصل والحصى بقى في شكل إرسال الميمز ومقاطع الفيديو والروابط، علشان تبعت للشخص التاني رسالة معناها “أنا بفكر فيك”، ومش بس للحبيب والحبيبة لأ ده للأب والأم والصديق والجار على رأي ليلى علوي، اعتبروها بتقوي لغة التواصل بينهم وبتعزز علاقتهم ببعض وبتخلق لغة حوار مشتركة ومواضيع بتتفتح من مجرد إرسال رابط.
يعني لما شريكك يبعتلك ريلز يبقى بيفكرك أنه موجود ولما صاحبك أو أهلك بيصبحوا عليك بريلز عن فوائد الطماطم للبشرة صبح عليهم أنت كمان بطريقة تنظيف السجاد،
جيل Z معروف إنه الفئة اللي اتولدت من نهاية الـتسعينات لحد نص الألفينيات، جيل عاش طفولته كلها على الإنترنت فطبيعي لما يخلق له مصطلحات أو لغات جديدة هتبى برضه مربوطة بالإنترنت، ولسه هنشوف من جيل Z كتير.
آخر كلمة: ماتفوتوش قراءة: بيوت الرمل والفريسكا: حاجات بنحبها في الساحل الطيب