في موسم المسلسلات، بتتفرج على المسلسلات ونفسك تبتدي حلمك في التمثيل بعد ما شوفت ممثلين كتير بيقوموا بأدوار مميزة وبيحققوا حلمهم على الشاشة. وعلشان تبتدي طريق التمثيل من الأحسن إنك تتعلم أكتر عن كل اللي يخص المهنة وعن ازاي تطور نفسك وتطور مهاراتك، وتدعم الموهبة بالتعليم، وعلشان كده هنقول لكم على ستوديوهات ومدربين بيعملوا ورش تمثيل، وكل التفاصيل اللي محتاج تعرفها عنهم.
ستارز
مروة جبريل فتحت ستوديو وفيه مدربين وممثلين بيقدموا الورش المختلفة دي، وبتقدم (casting calls) وفرص لأدوار في أعمال فنية بشروط مختلفة على حسب الأدوار، ومش شرط يكون لك خبرات سابقة أو أعمال فنية، ودي فرصة كويسة تبتدي بها طريقك في التمثيل.
بالنسبة لمروة، أهم حاجة إنك تصدق في نفسك وفي موهبتك ودايمًا بتقول “just believe” ودي الجملة اللي بتركز عليها مروة في تدريبها للممثلين.
الستوديو مكانه في شارع 15 المعادي، ومواعيده من الساعة 2 الضهر لـ 11 بليل. ورقم التواصل: 01144367088.
د/ محمد عبد الهادي
من أكبر وأهم مدربين التمثيل في الوطن العربي، افتتح ستوديو (الممثل من حوالي 27 سنة وموجود في ميدان لبنان، ورش التمثيل بتاعته خرجت ممثلين مهمين على الساحة الفنية دلوقتي؛ زيّ أحمد عز وأحمد الفيشاوي ومي عز الدين وعمرو يوسف وبسمة.
د/ محمد عبدالهادي بيدرب في ورش تمثيل مختلفة مش في ستوديو واحد، وعدد المشتركين في الورشة مش بيكون أكتر من 10 أفراد، بيتم اختيارهم بعد مقابلة شخصية معه، وعلشان كده التواصل من البداية بيكون مع د/ محمد بنفسه على رقم التليفون: 01005661266.
د/ محمد له تاريخ عظيم في ورش التمثيل، من وقت ما كان عايش في أوروبا وشارك في ورش تمثيل في بلاد مختلفة، ودلوقتي كمان بيقدم منح بأسعار مخفضة للطلبة، وبيعمل يوم مفتوح كل يوم جمعة في مقر كينج توت في عمارات العبور وبيدرب على التمثيل سواء قدام الكاميرا أو على المسرح، وشايف إن المتدرب لازم يحصل على الحد الأدنى من ساعات التدريب وهو 150 ساعة، علشان يكون أتدرب على النواحي المهنية المختلفة.
أحمد مبارك
مدرب تمثيل بيعمل ورش في أماكن مختلفة، تخصصه المهني في معهد السينما كان التمثيل والإخراج، وهو الـ (acting coach) في مسلسلات مهمة بنشوفها على التليفزيون دلوقتي؛ زيّ (ملف سري) و(نقل عام).
بيعمل ورش لإعداد الممثل بأسعار مختلفة، ومنهم اللي بأسعار رمزية، ودي ميزة هتشجعك تبتدي في خطوة لحلمك.
لوك لينر
ممثل ومخرج أمريكي-مصري متخصص في مجال التدريب على التمثيل، وكمان شارك بالتمثيل في مسلسل (السهام المارقة) وفيلم (رأس السنة)، عنده ستوديو بيقدم فيه ورش للتمثيل لأعمار مختلفة، للمبتدئين وكمان للي سنهم أقل من 20 سنة، الستوديو اسمه (Luke Lehner Studios)، وبيشارك كمان في ورش التمثيل المدرب المعروف رمزي لينر.
لوك هدفه إنه يشجع الممثلين اللي بيتدربوا معه ويعلمهم يشيلوا مسؤولية الأدوار الفنية اللي بيعملوها، ويبتكروا فيها. وكمان بيحب إن الممثل يضيف من خبراته الشخصية في حياته اليومية، لإن الجمهور بيصدق ويهتم بالشخصيات اللي بيشوف فيها واقعية أكتر على الشاشة. أما بالنسبة للأدوات والتكنيك، لوك بيهتم بإن الممثلين يشتغلوا على حركات جسمهم، اللي يعتبر عامل رئيسي في أداء الشخصية اللي بيمثلوها؛ علشان يقدروا يكونوا مبدعين.
الستوديو كمان بيقدم ورش لتعليم الارتجال، وموجود في المعادي، ومواعيده من 12 الضهر لـ 10 بليل، ورقم التواصل: 0225262319
نديم
عمل ماجستير في لندن، وكان بيحضر هناك ورش تمثيل كتير واتعلم ازاي ورش التمثيل بتتعمل من الأساس وازاي يستفيد من الموجودين، وبعد كده بقى هو اللي يعمل ورش عمل. وفي حوارنا معه، قال لنا إنه دايمًا بيحب يتعلم أكتر سواء مهنيًا أو كمان في التكنيك نفسه، وبيحاول دايمًا يتعلم كل حاجة جديدة ويكوّن خبراته، علشان يقدر يفيد اللي بيتعلموا منه. وقال إن الحاجات اللي بتلهمه هي العمل الجاد، وإن الناس يكون عندها فضول، والانفتاح على وقبول المدارس المختلفة وبعدين يشتغل على دمجهم سوا.
نديم بيهتم بإن اللي بيتعلموا في ورش التمثيل معه يكون عندهم حرية في التعبير وفي الاكتشاف ومايكونوش بيحدوا نفسهم إن في حاجة صح وحاجة غلط لكن يجربوا ويتعلموا، ويكون عندهم مرونة سواء في الجسم وتعبيراته أو كمان في أفكارهم، ويكونوا حقيقيين على قد ما يقدروا.
وبالنسبة لنصايح وأحلام نديم لعالم صناعة الأفلام في مصر، نفسه يكون في إدارة للوقت، ومعاملة للممثلين والممثلات أحسن ويكونوا بيسمعوا لهم ولرأيهم ويحترموا وقتهم، بالذات إن الجداول، اللي ساعات بتكون مزنوقة، بتأثر على شغل الممثلين والممثلات.
بي أكتينج
مع المدرب خالد صفوت، المخرج المصري اللي عمل كاستينج في مسلسلات مميزة زيّ “طريقي” سنة 2015، ومسلسل “هي ودافنشي” في 2016، ومسلسل “قصر النيل” سنة 2021، والسنة دي لمسلسل “سوتس بالعربي”، علشان كده هيكون عندك فرصة مش بس تتعلم التمثيل، لكن تلاقي أدوار في مسلسلات وأفلام مهمة.
عرب فيلم سكول
مش بس ورش تمثيل، لكن كمان بتقدم ورش عمل مختلفة لأي حد حابب يتعلم التمثيل أو الكتابة أو التصوير، مع أهم وأكبر مدربين في مصر في كل مجال، زيّ أحمد مراد في الكتابة، والورشة الجاية للتمثيل أعلنوا عن تفاصيلها وهتكون مع محمد رحمو وميعادها في شهر مايو الجاي، وهتكون عبارة عن 12 سيشن، وتقدروا تحجزوا وتعرفوا تفاصيل أكتر من صفحتهم على الإنستجرام من هنا.
ورش العمل بقت عامل مهم في نجاح الأعمال الفنية وحتى في تقدم وتطور الممثلين وشطارتهم، والممثل الشاطر هو اللي يحافظ على إنه يكون دايمًا بيتعلم وبيطور من نفسه. الورش دي كمان هتساعدك بأشكال مختلفة في بداية مشوارك لو أنت حابب تبتدي في مجال الفن بشكل محترف.