بالصور: افتتاح معرض “كنوز الفراعنة” في باريس بالتزامن مع وصول تمثال توت عنخ آمون الشهير
وصل يوم الخميس تمثال الملك المتوج توت عنخ آمون -من الأسرة الفرعونية الثامنة عشر- إلى العاصمة الفرنسية باريس من أجل بداية معرض “كنوز الفراعنة” اللي طال انتظاره. باريس كانت الوجهة التانية ضمن قائمة بعشر مدن ضخمة حول العالم هيتعمل المعرض فيها وكان أولها مدينة لوس أنجلوس الأمريكية.
وزير الآثار المصري خالد عناني حضر افتتاح المعرض في متحف “La Villette” الفرنسي وكان بصحبة عالم الآثار المصري الشهير زاهي حواس ووزير الثقافة الفرنسي فرانك ريستر. الوزير بدوره ألقى كلمة تعريفية للحضور عن الثقافة المصرية وجمال البلد وشجعهم كلهم يزوروا مصر.
وفقًا لمنظمي المعرض، حوالي 130,000 تذكرة اتباعوا مقدمًا ومن المتوقع إن العدد يزيد في الأيام الجاية بعد الافتتاح الرسمي للمعرض امبارح.
والجدير بالذكر إن معرض “كنوز الفراعنة” بيحتوي على أكتر من 150 قطعة أثرية مختلفة من مقبرة الملك توت عنخ آمون منهم حوالي 50 قطعة أول مرة يتعرضوا خارج البلد من وقت اكتشاف المقبرة.
زوار المعرض هيكون عندهم فرصة يتعلموا عن التراث الفرعوني لمصر وإزاي علم الآثار حديثًا قدر يستوعب السياق التاريخي لكتير من قطع مقبرة الملك توت. وبالإضافة لده كمان المعرض -اللي هيستمر لمدة ست شهور متواصلة- هيكون فيه عدد من الفيديوهات اللي هتقرب للجمهور فكرة التحنيط عند الفراعنة وأقرب ما توصلنا له من افتراضات بتفسّر عملية التحنيط وخطواتها.
“المعرض بدأ في مدينة لوس أنجلوس في شهر مارس 2018 ودلوقتي وصل باريس، ودي رسالة سلام من المصريين للعالم كله علشان العالم يعرف قد ايه المصريين القدماء بنوا حضارتهم على الإيمان والمعرفة والشغف وحب الفن” كانت كلمة الوزير عناني بعد الافتتاح.
وللي مش هيقدر يحضر المعرض، جبنالكم صور معبرة من أجمل القطع المعروضة واللي بتشهد على إبداع الفراعنة بفن النحت.
