مصر بتعيش موجة طقس شديدة الحرارة، وكلنا حاسين بدرجات الحرارة اللي زادت بشكل جنوني على كل محافظات مصر، واللي خلى ممارسة الحياة اليومية بقت شبه مستحيلة بالذات في أوقات الضهر والعصر اللي بتبقى فيهم درجات الحرارة خطر جدًا على الناس.
الدكتور محمود شاهين، مدير مركز التحاليل والتنبؤات الجوية بهيئة الأرصاد الجوية، بيقول إن درجات الحرارة ونسبة الرطوبة خلال الأيام اللي فاتت قَلِت بشكل ملحوظ عن الفترة اللي قبلها.
انخفضت الحرارة ما بين درجتين وتلات درجات وبقت العظمى في القاهرة ما بين 39 و38، ورغم إننا مبسوطين جدًا بانكسار درجة الحرارة شوية لكن الدكتور محمود شاهين بيحذر إن درجات الحرارة هترجع ترتفع تاني وممكن توصل لفوق الأربعين خلال الأيام اللي جاية.
امتى موجة الحر دي هتخلص؟
بخصوص الوقت اللي هتخلص فيه موجة الحر الشديدة دي، بيقول دكتور شاهين إن مصر هتفضل تعيش درجات الحرارة الشديدة دي لحد آخر شهر أغسطس، يعني كده قدامنا 15 يوم كمان في موجة الحر دي. ومن الجدير بالذكر إننا عايشين واحد من أسوأ فصول الصيف من خمس سنين.
ليه درجات الحرارة مرتفعة جدًا كده؟
التغير المناخي بسبب زيادة نسبة الغازات الدفيئة، زيّ ثاني أكسيد الكربون، في الغلاف الجوي لكوكب الأرض خلى قدرة الكوكب على التخلص من حرارة الشمس للفضاء الخارجي أصعب بكتير. الغازات الدفيئة بتزود درجة الحرارة بشكل كبير جدًا، وكل ما نسبتها بتزيد في الغلاف الجوي درجة حرارة الكوكب بتزيد، ومعنى كده إن فصول الصيف الجاية ممكن تكون أسوأ من كده بكتير.
ازاي نحمي نفسنا من مخاطر درجات الحرارة العالية؟
درجات الحرارة العالية جدًا دي ممكن تكون خطر جدًا على الناس، وفي ناس ممكن تموت بسبب ضربات الشمس.
علشان تحمي نفسك من ضربات الشمس لازم تتأكد إنك ماتخرجش في الأوقات اللي الشمس فيها بتكون قوية زيّ أوقات الضهر والعصر، ولو اضطريت تخرج في الأوقات دي، اتأكد من إنك هتلبس هدوم واسعة وألوانها فاتحة وتكون قطن. كمان اتأكد من إن معاك مياه كفاية علشان مايحصلكش جفاف من العرق الكتير.