خلال الأيام اللي فاتت، بدأت شخصية الممثل المصري علي قاسم (شريف) في مسلسل الهرشة السابعة، تشغل جمهور المسلسل بشكل كبير.
وبيقدم قاسم في المسلسل شخصية فنان متحرر ومتفتح وأسلوب حياته بعيد عن تقاليد المجتمع المصري.
سألنا علي إذا كان متوقع ردود الفعل القوية دي على الشخصية، وقال: “لأ خالص، عمومًا ماحدش من صُناع المسلسل اتوقع إن العمل ممكن يسبب الضجة دي بسرعة كده”.
التعليقات على شخصية شريف جت في معظمها إيجابية، لدرجة إن في ناس وصفت شريف بإنه “تويتر أكونت”، عقليته متفتحة ولا إنجابي وعنده خوف من الالتزام وفنان، يعني واحد من شباب تويتر زي ما قال الكتاب.
البعض علق على هدوء شريف، وقالت وعد: “ممكن تروح تخلص كل المشاوير اللي وراك وهترجع تلاقي الفنان علي قاسم في نفس الجملة مش هيفوتك حاجة”.
وبيقول علي عن أوجه التشابه بينه وبين شريف: “في تشابه كبير بيني وبين شخصية شريف، ودايمًا بدور على أوجه التشابه بيني وبين أي شخصية بعملها وبستخدمها في أداء الشخصية”.
وده اللي أشار إليه مؤمن في تويت: “علي قاسم طالع في شخصية شاب روش بيدعم صاحبته في شغلها.. ودمه خفيف ومُتفهم. دايمًا المخرجين بيختاروه في أدوار ذكية وشبهه، مافيش مرة عمل دور يخيب”.
إعجاب الجمهور بشخصية شريف مش لمجرد كونه شاب وسيم وشيك، وده اللي وضحته فاطمة: “بحس إن اللمة حوالين علي قاسم مش حلاوته، ولكن شكله متربي ومؤدب، واحنا البنات بنحب الولاد المؤدبة”.
سألنا علي عن إحساسه ناحية ردود الفعل الإيجابية دي وأكد إنه سعيد جدًا بها، وقال إنه ماقراش التعليقات لسه، وقال: “أنا دايمًا بعزل نفسي في رمضان عن ردود الأفعال على السوشيال ميديا وفي الإعلام، علشان أعرف أركز في الشغل”.
وعن زميلة العمل أسماء جلال، بيقول علي: “اشتغلت مع أسماء كتير قبل كده، ومعنديش شك إن في ما بيننا كيمياء لطيفة، ومن أول مرة اشتغلنا فيها مع بعض كنا حابين نشتغل مع بعض تاني”.
وعبر علي عن سعادته بالشغل في المسلسل، وقال إن صُناع المسلسل بالنسبة له عيلته، ووجه الشكر لكل الناس اللي اشتغلت معاه، وبالذات المخرج كريم الشناوي.
وأنت إيه رأيك في شخصية شريف وردود الفعل عليها؟