من أول كام يوم في رمضان، الناس قالت آراء مختلفة في المسلسلات اللي بتتعرض لحد دلوقتي، منهم اللي بيتكلموا عنه بشكل يومي وحاسين إنه واقعي بشكل جميل، ومنهم الكوميدي اللي بيعتمد على كوميديا الموقف بشكل خفيف وسريع وغير مفتعل، واللي قالوا عن مسلسلات إخراجها وكادراتها ممتازة لكن محتواها ضعيف. تعالوا نشوف الناس قالت إيه عن المسلسلات لحد دلوقتي، وشاركونا كمان بآرائكم.
الهرشة السابعة
أغلبية ردود الأفعال من الجمهور على المسلسل ده أجمعت على حاجة واحدة وهي الواقعية، المشاهدين حاسين إن المسلسل بيواجههم بمخاوفهم ومشاكلهم بشكل بسيط وواضح، والحوار بين الممثلين واقعي لدرجة إنهم قالوا إنهم حاسين إن الحوار ده بيحصل بينهم وبين أصحابهم فعلًا. من غير تزويق للكلام أو تعقيد في الدراما، الممثلين بيوصلوا الإحساس للمشاهد بكل سلاسة، مسلسل دافي وواقعي الناس حسوا به في أول حلقاته.
سره الباتع
مع الجدل اللي بيصاحب المسلسل حتى من قبل عرضه، والخلاف على المخرج خالد يوسف، لكن مع عرض أول حلقات (سره الباتع) ناس كتير علقوا عليه بإن الإخراج وكادرات التصوير والألوان جميلة والصورة بتجذب المشاهد، لكن قالوا عن المحتوى نفسه ضعيف، مع وجود أخطاء في المسلسل، أشهرها جنود الاحتلال الفرنسي والتعليقات اللي اتقالت بعد عرض الحلقة بأخطاء تاريخية. ده غير آراء بعض الجمهور بإن توظيف المهارات التمثيلية في المسلسل لم يتم بشكل صحيح برغم وجود ممثلين كبار.
جعفر العمدة
على عكس الدراما اللي متعودين عليها من محمد رمضان، ناس كتير قالت عن (جعفر العمدة) إن فيه كوميديا خفيفة معظمها بتعتمد على كوميديا الموقف، اللي بتظهر بتلقائية وتناغم بين الممثلين، ده غير صورة والد جعفر العمدة اللي الناس قالت عنها سبب كوميدي أساسي في حلقات المسلسل، وحديث هالة صدقي مع الصورة بشكل مستمر.
سيرة الإمام
المسلسل بيتناول قصة الإمام الشافعي، وفي أول حلقاته أثار بعض الجدل بين المشاهدين ما بين مؤيدين ومعارضين، وبين ناس شايفة إنه بيقدم نموذج جيد، وبين ناس شايفة إن مسلسلات السرة الذاتية بيصعب تقديمها بشكل يعجب الجمهور بنسبة 100% وإنها دايمًا بتكون محل جدال خصوصًا لو الشخصية دينية.
المداح
لاحظنا وجود جمهور جديد بيتابع المسلسل السنة دي حتى لو ماكانوش من جمهوره في السنين اللي فاتت، وحابين يعرفوا أكتر عن القصة ومستمتعين بتداء الممثلين بين إنس وجن. خصوصًا إن الرعب في مجتمعنا من الحاجات اللي المشاهدين بيحبوا يشوفوها على الشاشة وبيحبوا صراع الإنس والجن، خصوصًا لما يكون زي الشيخ صابر اللي بيحارب الشياطين بعد توبته، وهما بيحاربوه هو وأهل بيته وبيحاولوا ياخدوا ابنه.
متفقين مع الآراء وردود الفعل دي ولا رأيكم إيه؟