شارك في الكتابة: نيره عبدالعزيز
كل سنة في رمضان، بقينا نستنى ونخمن الحلويات هيعملوا فيها إيه السنة دي وهيسموها إيه، بما إن بقت المنافسة على الأسماء الغريبة واخدة حقها، لدرجة إنهم بيعتمدوا على الاسم الأغرب هو اللي يشد الناس من غير حتى ما يهتموا يعرفوا المكونات عبارة عن إيه، عادي الناس بتحب تجرب وبتحب الاختراعات بدل الحلويات التقليدية اللي اتعودنا عليها في رمضان.
تعالوا ناخد جولة في اختراعات السنة دي من محلات الحلويات في مصر.
المكشكشة
لحد دلوقتي واخدة صيت من أول رمضان، طب إيه اللي كشكشها دي ولا جواها إيه؟
بشكل أساسي هي بقلاوة، بس بالحليب والمكسرات وكريمة الفانيليا، مع شوية لخبطة في الوصفة اللي متعودين عليها للبقلاوة من سنين. بس عمومًا لو أنت من محبي البقلاوة هتعجبك المكشكشة.
لكن خلي بالك علشان كمية الحلويات اللي فيها هترفعلك السكر، وسعرها هيرفع السكر أكتر، لإن سعرها 455 جنيه.
المدحرجة
أول حاجة جت في بالنا لما سمعنا كلمة “مدحرجة” هي البيض المدحرج، والوقائع الشهيرة له على سفرة سحور رمضان في السنين اللي فاتت والأسعار المريبة اللي اتشهر بها، لكن السنة دي المدحرجة جاية لنا كصنف حلويات، طب دحرجتوها ازاي دي؟
العامل الأساسي هنا هي الكنافة -اللي ماينفعش نسيبها في حالها- ومعمولة على شكل كرات ومحطوطة على كريمة وفستق. وده يبقى الاختراع الأحدث على نفس نهج الغرقانة والشرقانة اللي ظهروا السنة اللي فاتت.
المدحرجة بتنافس السنة دي بنفس سعر المكشكشة 455 جنيه.
سمبوسك بالشوكولاتة
داخلين على الناس باسم عادي كده الناس هتاكل وشنا، بس يعني الاختراع ده معتمد على إنه بيهدم الثوابت اللي متعودين عليها في السمبوسة أو السمبوسك، واللي تعتبر بديهيات على سفرة رمضان سواء محشية لحمة مفرومة أو جبنة.
السنة دي حشوها بالشوكولاتة وغرقوها كمان في الشوكولاتة من برا، وسعرها 275.
أم علي كريم بروليه
أحدث اختراعات الشامي والمغربي، الكريم بروليه الفرنسي دخلناه معانا رمضان، ومش بس كده، حطينا عليه أم علي، طب ده حتى الأسماء جنب بعض عاملة قفلة. هو كده كده خلاص الحلويات الشرقية تقريبًا مالهاش أهل يسألوا عليها وبقالها سنين متبهدلة معانا في الاختراعات، ومتفقين ماشي إن العولمة دخلت القارات في بعض، بس توصل لأم علي بالكريم بروليه!
لو عايزين تجربوا انفتاح الشرق على الغرب ده، هتلاقوه في أكتر من محل، والأسعار للطاجن الصغير حوالي 70 جنيه، والحجم الكبير حوالي 400 جنيه.
المسخسخة
المسخسخة؟ هي حصلت؟ المنافسة بين محلات الحلويات كبيرة بخصوص المسخسخة، عملوا منها المسخسخة أوي ومسخسخة للعيلة والموضوع كبر ووسع منهم خالص، بس يمكن علشان مكوناتها مسخسخة في نفسها وبتدوب من أول قطمة، وبتحس بعدها بكم من الدلع رهيب.
المكونات بتتعمل بأكتر من نوع من أنواع الكيكة، زي كيكة الحليب التركي، وكيكة اللبن مع الكريمة اللباني، ومتغطية بالتوفي وفيها طعم الكراميل، وسعرها 250 جنيه.
الزغروطة
كنا بنسمع بس الزغروطة في الأفراح وليالي الملاح، عمرنا ما سمعنا عنها وهي بتتاكل، هي عبارة عن عيش السرايا محشية بكريمة البلح ومعاها رشة جريئة من الفستق.
بس لما عرفت سعرها قلبي زغرط من الفرحة، لإنها بـ 50 جنيه بس.
هشتكة
القلب اشتكى من قلة الهشتكة، ناقص السهوكة ونكون كملنا الألبوم.
مقادير الهشتكة معانا النهارده كيك باللبن وفوقيها طبقة من الكنافة ومعاها خلطة سرية من المكان اللي بيعملها، وسعرها 50 جنيه.. سعرها طيب برضه زي اللي قبلها.
الغرقانة
الغرقانة ولا الشرقانة؟ من الحلويات الجديدة اللي عاملة دوشة، وسعرها كمان عامل دوشة، بمتوسط 380 جنيه في المحلات.
أما عن المكونات، فهي غرقانة فعلًا هما مابيكذبوش، عبارة عن بسبوسة أو كنافة متغرقة قشطة ولبن وفيها طبقات كيك وفستق، وعلى علبتها مكتوب تنويه إنك لازم تسخنها في الميكرويف لمدة أربع دقائق وبعد تسخينها هتعرف ليه اتسمت بالغرقانة.. شوية تشويق مالهمش حل.
كل سنة بنتفاجئ بإبداعات في الأسماء أكتر من اللي قبلها، وفي الغالب أصحاب المحلات بتتعمد ده علشان تجري ريقنا في الصيام، ودي بتعتبر حيلة خبيثة من حيل الدعايا والتسويق.