بعد ما وصل بلاغ لرجال الشرطة في محافظة الجيزة بخصوص القبض على شاب بينتحل شخصية لاعب المنتخب المصري مصطفى محمد، خلال أدائه إمتحان نصف العام في واحد من المعاهد التعليمية الخاصة على طريق شبرامنت بأبو النمرس في الجيزة.
وكان وصل بلاغ لغرفة عمليات الجيزة من مسئولين في معهد تعليمي خاص في الجيزة، إنهم قبضوا على شاب بياخد امتحان نص السنة والطالب كان مش مقيد بكشوف الطلبة.
بعد البلاغ اتحرك رجال الشرطة للمعهد وبعد الفحص اتضح إنه خلال أداء المتهم للامتحان اشتبه فيه مراقب اللجنة، ولما طلب منه يشوف البطاقة ارتبك ورفض في البداية ومع إصرار المراقب وراه بطاقته الشخصية، وبعد ما راجعوا كشوف الطلبة اتضح إنه مش مقيد فيها، ومن خلال الفحص اتضح كمان إن ورقة الإجابة اللي كانت معاه مكتوب عليها اسم نجم “الفراعنة” مصطفى محمد والمقيد كطالب في المعهد، اتضح كمان إن اللاعب المصري بيغيب عن الامتحانات لإنه موجود مع منتخب بلاده في كأس الأمم الأفريقية اللي بتستضيفها الكاميرون لحد السادس من فبراير اللي جاي.
وفي التحقيقات اعترف الشاب المتهم بارتكاب الواقعة وبإنه صديق اللاعب وحاصل على “ليسانس آداب”، وإن دي كانت المادة الأولى اللى يؤدي فيها الامتحان بدل من صديقه اللاعب، وقال المتهم، خلال التحقيقات: “كنت عاوز أنقذ صاحبي علشان مستقبله مايضيعش، ده بيمثل مصر في بطولة”.