من كام يوم أعلنت منصة اوصل بالعربي لتطوير وتعليم المزيكا في مصر عن فتح باب التقديم للموسم الثاني من برنامج السلم اللي عن طريقه هيقدروا يعلموا ويأهلوا جيل جديد من الموسيقيين الشباب في البلد. البرنامج ده بيدي الشباب الموهوب موسيقياً فرصة لتحقيق حلمهم عن طريق إنه بيسهّل عليهم إمكانية دخول الساحة الموسيقية على إيد مجموعة من أشهر وامهر صناع المزيكا في مصر.
اوصل بالعربي من تأسيس أوسو لطفي الموسيقي والجيتاريست المصري، وهو أول موقع لتعليم المزيكا باللغة العربية على الإنترنت في مصر. السلم هو البرنامج اللي بيكملوا بيه مهمتهم في الوصول لكل مُحبي المزيكا في أي حتة في مصر. والبرنامج عبارة عن مسابقة بيتم من خلالها جمع مجموعة من الشباب الموهوبين في فنون موسيقية مختلفة، وخلال تلت شهور بيقابل الشباب فنانين معروفين من المجال وبيستفادوا من خبراتهم لحد ما في النهاية بيقدروا ينتجوا المزيكا بتاعتهم.
اتخرج من السلّم الموسم اللي فات 8 طلاب، وبنهاية فترة التدريب، كل طالب قدر يألف تراك المزيكا الخاص بيه ويسجله ويقدمه للجمهور. والطلاب دول لعبوا تلات حفلات للايف قدموا فيهم مزيكتهم في أنحاء مُختلفة من الجمهورية.
الانضمام لمسابقة السلّم سهل ومُتاح للجميع، كل اللي عليك تعمله هو إنك تسجل فيديو لمدة دقيقة واحدة بتعزف أو بتغني فيه، وبتملى الأبليكشن اللي بتجاوب فيه على أسئلة معمولة مخصوص علشان تقدر اللجنة تعرفك أكتر. وبمجرد انتهاء مدة التسجيل، هترفع اللجنة مجموعة من أفضل الفيديوهات على النت علشان يقدر الجمهور يشاركهم في اختيار الطلاب، وهيتأهل 15 طالب للمرحلة اللي بعدها.
المسابقة السنة دي برعاية الصندوق العربي للثقافة والفنون افاق، وعلى الرغم من تركيز اوصل بالعربي على عزف وصناعة المزيكا أكتر من الغناء إلا إنهم قرروا يضيفوا الغناء للفئات اللي تقدر تشارك وتستفاد من المشروع.
المسابقة هتتعمل في ظل ظروف وباء الكورونا والعزل الصحي اللي خلت القائمين عليها يقرروا يكملوا في المشروع عن طريق بعض التغيرات البسيطة زي إن المقابلات والتدريبات بين المتسابقين والفنانين هتكون على النت في حالة عدم تحسن الظروف، وده من إيمانهم إن الفن مش ملغي ولا هيكون مُقيد بأي ظروف.