افتتحت السعودية مستشفي السلام البيطري، أكبر مستشفي لعلاج الجِمال في العالم، والمستشفى دي هيتلقى فيها العلاج عشرات الجِمال والنوق، ومش بس كدة، المستشفي فيها كمان أقسام تانية متنوعة، وبيتركز نشاط المستشفي على البحوث والتطوير في مجال تربية الجِمال، وعمليات التخصيب، وكمان فيها قسم متخصص لتكنولوجيا الأجنة، وعلاج الأمراض المزمنة والمعدية، وقسم للجراحات و قسم للأشعة.
المستشفي تم إقامتها علي مساحة 70 ألف متر مربع، وعلشان كدة أُطلق عليها أكبر مركز في العالم لعلاج الجِمال، وبتقع بالقرب من مدينة بريدة في منطقة القصيم في وسط البلاد، لإن القصيم بتحتوي علي أكبر سوق للجِمال في العالم. وقبل كده كانوا تجار الجمِال بيضطروا يسافروا حوالي 655 كيلو متر علشان يعالجوا الجِمال، لكن بعد إنشاء المستشفي داخل المنطقة وفرت عليهم المشقة دي.
اتأسست المستشفي باستثمارات حجمها 137 مليون ريال سعودي، ما يعادل حوالي 36 مليون دولار، والاستثمارات الضخمة دي مجتش من فراغ أو هتروح للفراغ، لكن المستثمرين دول بيقدروا قيمة المخلوق ده خصوصًا في المنطقة العربية، وكمان لأهمية الحيوان ده من زمان، وضرورة وجود مكان مجهز بالكامل لعلاج الجِمال.
أول مستشفي لعلاج الجِمال في الشرق الأوسط كانت اتأسست في دبي بدولة الإمارات، في فبراير اللي فات، وتم إنشائها بتكلفة 40 مليون درهم، وبتتنوع الخدمات العلاجية اللي بتقدمها المستشفى زي المستشفى السعودي، وبتتميز بمعدات طبية حديثة منها التليسكوب الخاص بعمليات المنظار للحيوانات ذات العنق الطويل.