واقعة شوفناها من فترة واتكلمنا عنها، للأسف بقينا نشوف وقائع مشابهة بشكل متكرر، وهي الاعتداء بالضرب على اللي يخالف رأي حد، خصوصًا لو كانت ست، حتى لو دي حرية شخصية، فيه ناس بتدي لنفسها الحق تعتدي على حياة شخص لمجرد إنه بيمارس حقه وحريته في حياته اللي ماتخصش حد. رانيا رشوان بنت عايشة في الفيوم، قررت إنها تقلع الحجاب، فاتعرضت للضرب، ونشرت فيديو على السوشيال ميديا انتشر وقتها بشكل كبير والناس تضامنت معاها علشان تاخد حقها.
في الفيديو، رانيا رشوان قالت إن اهالي قريتها في الفيوم بيعتدوا عليها بالضرب وإنها بتواجه رفض شديد منهم لمجرد إنها خلعت الحجاب، وقالت: “المجتمع رافضني بسبب قلع الحجاب والقرية بتاعتي مش متقبلة وجودي، أنا مطلبتش من حد يقلع الحجاب زيي أنا قلعته بإرادتي الشخصية ومطلبتش من حد مساعدة ومش عايزين يد العون من حد”.
وطالبت الأجهزة الأمنية بحمايتها، وقالت إن بعض الأهالي بيرددوا شائعات إنها اعتنقت الديانة المسيحية، وهي خايفة من تعرضها للإيذاء من المتطرفين.
النهارده، محكمة جنح الشواشنة، دائرة جرائم العنف ضد المرأة، حكمت بحبس المتهم أحمد تحيف لمدة 6 شهور عن تهمة الضرب، و ٢٨ ألف جنيه غرامة عن تهمه التنمر، وان يؤدى للمدعية بالحق المدني مبلغ ١٠٠ ألف جنيه علي سبيل التعويض المدني المؤقت وده لإنه قام بالاعتداء علي المجني عليها هو وآخرين لقيامها بخلع الحجاب.
حكم بيرجع لرانيا حقها، وهيكون درس للي يفكر يتعدي على حدود حرية غيره لمجرد إن قراراتهم اللي تخصهم مش عاجباه!