كنا اتكلمنا قبل كده عن الكواليس الغريبة اللي بتحصل لأعمال فنية بعينها بسبب تناولهم موضوع الجن والعالم الآخر والتعاويذ، أعمال مشيت بمبدأ “اللي يحضر العفريت مايعرفش يصرفه”، بس النهارده هنتكلم عن العفاريت نفسهم اللي ظهروا في الأعمال وكانوا هما الأبطال بس على خفيف وجودهم ماعملش مشاكل لصناع الأعمال لأنهم لا دخلوا في تعويذات ولا شفرات كله كان في الخفيف ماعدا آخر واحد في القائمة.
سفير جهنم
البداية كانت مع أستاذ المسرح يوسف وهبي من أكثر من 50 سنة طل علينا بدور الشيطان نفسه في فيلم سفير جهنم، الاجتهاد كان واضح في ملابس وشكل الشخصية اللي عملت لنا تروما لحد دلوقتي، شيطان كل دوره أنه بيحاول يجذب الناس للهلاك وأسرة بعينها علشان يبين قدرة سيطرته على البشر بكل الوسائل، طول الوقت كان ظاهر لنا بعباءة وقرون وأنياب مناسبة أوي مع كتالوج الشيطان التقليدي.
خلي الدماغ صاحي
مطمئن أفندي سلطان كان نوع تاني من العفاريت، عفريت طيب قرر أنه يستخدم قدراته في إسعاد “كامل” اللي بيقوم بدوره مصطفى شعبان، ويساعده هو وأصحابه، عفريت دمه خفيف وتتخذه كصديق، بيعرف يعمل كل حاجة بس عنده ثغرات في إمكانياته، هيفضل طول الفيلم دايخ على خلطة الحواوشي اللي داقها في المحل ومش عارف يوصل لها مع إنه عفريت، وبرضه مش هيعرف يساعد طلبة الثانوية العامة في الامتحان وهيقعد يعيط جنبهم.
الفانوس السحري
عفركوش بن برتكوش ملك ملوك الجان اللي هيخرج من الفانوس السحري القديم لإسماعيل ياسين، وهيحققله أحلامه مش بس فلوس ولكن أماني معنوية زي التقدير وغيره، وهيبقى صاحب حكمة وعقلاني كده، يعني مثلًا نفتكر له موقف مع إسماعيل وهو بيطلب 10 الأف جنيه، عفركوش اتعصب وقال “10 آلاف جنيه كتييييير يا موصطافا … القناعة كنز لا يفنى” بعيدًا عن إن المبلغ وقتها كان حتى صعب يجيبه العفريت أو يصرفوا أي شخص سنه 1960، بس نلاقي فين كده عفريت قلبه علينا؟
عفريتة إسماعيل ياسين
مش عارفين إيه حكاية العفاريت اللي بتظهر لإسماعيل ياسين دي، بس المرة دي كانت عفريتة أو بمعنى أصح رقاصة قتيلة مثلت دورها الفنانة كيتي، روحها طلعت لإسماعيل علشان يساعدها تجيب حقها من الناس اللي قتلتها، وطول الفيلم هيدخلوا في مشاكسات ومشاحنات ومحاولات لحل اللغز.
الإنس والجن
سيبنا من الهزار بقى والعفريت الطيب والصاحب صاحبه، الدور اللي قام به عادل إمام كجن عايز يسيطر على يسرا ويبوظ لها حياتها، والترويج لفكرة عشق الجن للإنس واللي بيحصل في عالم الأرواح والعالم الخفي وازاي بيأثر على النفس البشرية، كل ده كان تقيل ودسم وتم تناوله من منظور أقرب للواقعية حتى في التعامل معاه والتخلص منه، فكان الجن اللي مانعرفش اسمه لحد دلوقتي هو الأعنف في قائمتنا للنهارده.
آخر كلمة: ماتفوتوش قراءة: بلسان حالهن: فنانات في مجالات مختلفة عبرن عن قضاياهن في أعمالهن الفنية