بواسطة: رحمة حجاج
“التجلي” هو فيلم وثائقي قصير بيتكلم عن تلاقي الأديان السماوية والمعالم الطبيعية في سانت كاترين. فيلم “التجلي” بيعتبر جزء من المشروعات السياحية والاقتصادية اللي بتنفذها الحكومة المصرية في المنطقة دي حاليًا. منطقة سانت كاترين معروف إنها منطقة مقدسة جدًا بالأديان السماوية التلاتة وده بسبب إنها مرتبطة بقصة تجلي الله للنبي موسى على الجبل في جنوب سيناء.
الفيلم من إخراج المخرج عبدالله مرسي والسيناريو من كتابة السيناريست علاء فرغلي وتصوير عبد الرحمن محمد ومونتاج أحمد سرحان وموسيقى وألحان محمد سامي، وتوزيع حاتم نصر، ومصحح لغوي عاطف عبد الحميد ماضي.
أما بالنسبة للتعليق الصوتي خلال أحداث الفيلم، فالإعلامي الكبير مفيد فوزي هو اللي بيعلق صوتيًا على أحداث الفيلم. ومن أهم الجمل اللي قالها الإعلامي الكبير مفيد فوزي وهو بيعلق على الفيلم وبيوصف سانت كاترين “إنها أرض السلام تبعث برسائل المحبة للعالم.”
الفيلم تحت إشراف الفنان تامر عبد المنعم، مدير قصر السينما التابع لوزارة الثقافة. وقال الفنان تامر عبدالمنعم إن الفيلم اتصور في مجمع الأديان بمدينة سانت كاترين ودير القديسة كاترين وكنيسة التجلي وجبل موسى والشجرة المعلقة ومسجد الدير وجبل البنات ومتحف الدير، يعني الفيلم اتصور في أهم الأماكن الدينية هناك.
الفنان تامر عبد المنعم قال برضه إن اللي عمل الفيلم هما شباب من اللي بيشاركوا في مبادرة “ابدأ حلمك.. السينما بين يديك” اللي أطلقتها وزارة الثقافة وخصصت لها معسكر سينمائي في سانت كاترين. الفيلم هيتعرض في قصر السينما وهيحضره فنانين كتير.
اللي أشرف على إخراج الفيلم هو المخرج الكبير فخر الدين نجيدة وقال إنه ماتدخلش خالص في عمل المخرج عبد الله مرسي، وإن هو اللي رشحه من وسط متدربين كتير علشان واثق إنه مخرج كبير ومجتهد رغم صغر سنه.
وفي نفس الوقت مصر هتنتهي من مشروع “التجلي الأعظم” في منتصف 2022. والمشروع ده بيهدف إنه يخلي المنطقة هناك تبقى مزار روحاني على الجبال المحيطة بالوادي المقدس وتطوير دير سانت كاترين وترميم الكنائس وتطوير منطقة الدير وطرق وادي حبران وإنشاء تلفريك بيوصل لجبل موسى.