على الرغم من عشق أغلبنا للبطاطس، هي مشهورة بأضرارها على الصحة، بس في الحقيقة هي مفيدة جدًا لينا لأنها نوع من أنواع الخضار، وبتحتوي على عناصر غذائية مهمة زي البوتاسيوم، والفيبر، وفيتامين سي، وخالية من الكوليسترول، والدهون، والصوديوم. والسبب في أضرارها الصحية هو ببساطة لأننا رابطين البطاطس بفكرة التحمير في الزيت.
ولأن معظم الناس بتحب البطاطس لجمال طعمها، وماتقدرش تستغنى عنها، سواء كوجبة سريعة، أو كأطباق جانبية أو رئيسية، جبنالكم وصفات مختلفة ليها لذيذة، وصحية.
البطاطس المشوية
هنحتاج حبتين من البطاطس، ولتر ونص مياه، وملح وفلفل أسود حسب الرغبة، ومعلقة زيت زيتون.
هنقشر البطاطس ونقطعها صوابع ونسلقها في المياه على حرارة متوسطة، ونسيبها لغاية ماتتسلق، بعد كدة نصفيها من المياه، ونحطها في صينية، ونرش عليها الزيت، والملح والفلفل، وندخلها الفرن على درجة حرارة 500 درجة مئوية، ونسيبها لغاية ماتتحمر.
البطاطس الكروكيت
هنحتاج كيلو من البطاطس، و3 بيضات، وكباية دقيق، وكباية بقسماط جاهز، وكبايتين من زيت الزيتون، ومعلقة ملح وفلفل، وبقدونس، وزعتر.
هنسلق البطاطس ونصفيها من المياه، ونهرسها، ونزود الملح والفلفل، والبقدونس عليها، ونعجنها. بعد كدة هنشكلها على شكل صوابع، ونحطها في الفريزر لغاية ما تجمد. ونجهز الدقيق في طبق، والبيض في طبق، والبقسماط في طبق، ونغمس صوابع البطاطس في الدقيق، بعد كدة في البيض، وبعدين البقسماط، وهنحطها في الزيت على النار لغاية ما لونها يكون أصفر، ونطلعها ننشفها من الزيت، ونرش عليها الزعتر.
شوربة البطاطس بالكريمة
هنحتاج 4 حبات من البطاطس متقطعة مكعبات، وبصلة مفرومة، وربع كباية بقدونس، ومكعب مرقة دجاج، وكباية ونص حليب، ومعلقتين كبار زيت زيتون، ومعلقة ملح وفلفل.
هنسلق البطاطس، ونسيبها تبرد في مياه السلق، ونحطها في الخلاط بالمياه، ونضربها لغاية ماتكون ناعمة، ونسيب كام مكعب على جنب للتزين. هنسخن الزيت في حلة، ونحط فيه البصل، ونقلب لغاية ما يصفر، وهنزود البطاطس من الخلاط، ونزود الحليب، ومكعب المرقة، والملح والفلفل، ونسيبها تغلي. ونقدمها سخنة، بعد ما نزينها بمكعبات البطاطس، والبقدونس.
سلطة البطاطس المخللة
هنحتاج كيلو بطاطس مسلوقة متقطعة مكعبات، ومعلقة ملح وفلفل، وربع جرام من الكركم، وحبة طماطم متقطعة صغير، ومعلقة صلصة طماطم، وشوية كسبرة مفرومة، ومعلقة ليمون، ومعلقة ثوم مفروم ناعم، ومعلقة خل، ومعلقة زيت زيتون، وكمون، وشطة حسب الرغبة.
هنخلط كل المكونات دي على بعض في طبق، ونزود عليه مكعبات البطاطس، ونسيبه في التلاجة لمدة ساعة يشرب التتبيلة.