لتوفير بيئة صحية وإيجابية للموظفين في مقر عملهم، قدر إتنين موظفين شركة كهرباء الشارقة إنهم يبتكروا غرفة سيوا للأكسجين، اللي بتدي جرعة أكسجين للموظف في خلال 10 دقائق بتساعده علي استعادة تركيزه بنسبة 99%، وبتخليه قادر على استعادة نشاطه مرة تانية، وكمان تقليل الإرهاق والتوتر. الفكرة جت لمبتكرين الغرفة بعد ما لاحظوا إن زملائهم في الشركة بيستخدموا كميات كبيرة جدًا من المسكنات بشكل يومي، وكمان بيشربوا القهوة بكميات كبيرة علشان تساعدهم يقللوا شعورهم بالصداع والإرهاق، وطبعًا دي طرق غير صحية وبتأثر بشكل سلبي وتراكمي على الصحة، ومن هنا جت فكرة غرفة الأكسجين لمحمد عبدالله مدير إدارة التميز، والمهندس سيف العبيدلي مدير مكتب الصيانة في الشركة.
الغرفة مزودة بأحدث التقنيات والأنظمة الذكية، وكرسي خاص بيتشكل على شكل وطبيعة جسم الموظف لما يقعد عليه في جو مناسب بيساعد على تقليل التوتر واستعادة التركيز، وكمان الغرفة مزودة بنظام مراقبة سمعية وبصرية بتسهل التدخل السريع إذا احتاج الموظف لأي مساعدة. وبيكون في متخصص بيشغل الجهاز بعد دخول الموظف للغرفة، وبعدها بيخرج الأكسجين النقي من الأنابيب المخصصة ليه في الغرفة، وده بيدي الموظف الشعور بالاسترخاء والراحة، وبيساعده على التخلص من الإجهاد.
الغرفة مبنية من الخشب الطبيعي وبإضاءة خفيفة مناسبة لجو الاسترخاء المطلوب فيها، وكمان بتحتوي على شاشة بيتعرض عليها مناظر طبيعية بتساعد في تهيئة الجو العام المطلوب في الغرفة. وعلى الرغم من إن جرعة الأكسجين بيتراوح سعرها بين 200-300 درهم، بيتم تقديمها مجانًا للموظفين، ودلوقتي هما شغالين على براءة الإختراع اللي بيعتبر اختراع طبي 100%.