من أصل 193 دولة بالأمم المتحدة، 138 دولة معترفة بالأراضي الفلسطينية -قطاع غزة والضفة الغربية- كدولة مستقلة عن إسرائيل وقائمة بذاتها، وعلى الرغم من ده، فشركات التقنية العملاقة زي جوجل وأبل مش كاتبين إسم فلسطين في تطبيقات الخرائط بتاعتهم اللي بيعتمد عليها ملايين حول العالم بشكل يومي.
على السوشيال ميديا كتير لاحظوا الموضوع وده، وسألوا ليه فلسطين مش جزء من الخرائط دي؟ ومع تزايد التساؤلات، وبسبب الجدل اللي حصل، بدأ كتير يتهم الشركتين بالعنصرية ضد أهل فلسطين.
معظم دول الغرب وعلى رأسهم الولايات المتحدة الأمريكية مش معترفين بفلسطين كدولة، لكن على الكفة التانية الأغلبية العظمى من دول العالم موقفهم في صالح الدولة العربية. في 2011، الأزمة خلت مجموعة من الصحفيين الفلسطينيين يوجهوا رسالة لجوجل ينددوا فيها بموقف الشركة من عدم وضع اسم دولتهم في خرائطها.
الشركة ردت وقالت إنهم عمرهم ما كانوا حاطين اسم فلسطين في الخريطة، وإن كان فيه مشكلة في التطبيق مسحت اسم كلٍ من “الضفة الغربية” و”قطاع غزة”، وإنهم شغالين على المشكلة عشان يرجعوا الاسماء دي للخريطة بتاعهم تاني.
مناطق نزاع تانية زي كوسوفو في صربيا في أوروبا الشرقية اللي فيه بس 97 دولة معترفين بيها وتايوان في الصين اللي فيه 15 دولة بس معترفين بيها موجودين على خرائط جوجل وأبل باسمائهم، فالسؤال اللي الإنترنت بيلح فيه على الشركتين هو ليه الكيل بمكيالين؟ وليه اسم فلسطين مش موجود على الخريطة؟