النهارده الأربع، افتتاح معرض القاهرة الدولي للكتاب الدورة الـ 54 بشكل رسمي، في مركز مصر للمعارض الدولية بالقاهرة الجديدة. وجيه الافتتاح بعد ما خلصت وزارة الثقافة تنسيق كل التجهيزات والاستعدادات لافتتاحه مع الشركة المنفذة.
وحضر الافتتاح الدكتور مصطفى مدبولي، رئيس مجلس الوزراء، والدكتورة نيفين الكيلاني، وزيرة الثقافة، أما استقبال الجمهور داخل المعرض هيكون بداية من بكرة الخميس.
شعار المعرض السنة دي هو “على اسم مصر.. معا نقرأ.. نفكر.. نبدع”، وهتستمر فعالياته خلال الفترة من 25 يناير لـ 6 فبراير 2023.
وضيف الشرف في الدورة الحالية من المعرض هي المملكة العربية الهاشمية، وعلشان كده هيكون الافتتاح الرسمي بكرة بحضور الدكتور هيفاء النجار، وزيرة الثقافة الأردنية، وهيكون معاها رئيس مجلس الوزراء ووزيرة الثقافة المصرية.
وقع الاختيار السنة دي على الشاعر صلاح جاهين، علشان يكون شخصية السنة دي في الدورة الحالية من معرض القاهرة الدولي للكتاب، وكمان تم اختيار الكاتب كامل الكيلاني شخصية معرض الكتاب للطفل.
بتضم فعاليات معرض الكتاب 500 حدث ثقافي متنوعين بهدف ترسيخ الهوية، ده غير اللقاءات والندوات مع المبدعين والكتاب والمفكرين والفنانين البارزين وقامات مصرية وعربية وعالمية، بهدف تعزيز دور الثقافة في بناء المستقبل.
مواعيد العمل وحجز تذاكر معرض القاهرة الدولي للكتاب 2023
تذكرة دخول معرض الكتاب 2023 سعرها 5 جنيه بس، وتقدر تحجزها من خلال رابط الحجز الإلكتروني هنا، وتقدر تحجز أكتر من تذكرة في نفس الوقت، ودي خطوات الحجز.
1- الدخول للموقع الإلكتروني لمعرض الكتاب.
2- تسجيل الدخول أو إنشاء حساب جديد.
3- اختار حجز التذاكر.
4- اختار عدد التذاكر اللي عايز تحجزها.
5- املأ بيانات صاحب تذكرة معرض الكتاب (الاسم ورقم التليفون).
6- تحديد طريقة الدفع (الفيزا كارد أو بطاقة ميزة أو أي طريقة تانية من طرق الدفع الموجودة).
7- بعد الدفع، هيتبعت لك التذكرة على البريد الإلكتروني، أو في رسالة على واتساب رقم التليفون اللي دخلته.
8- وهتظهر لك إمكانية طباعة التذكرة أو تحميلها على التليفون، وبيكون مكتوب عليها رقم بوابة الدخول.
هيستقبل المعرض الجماهير من يوم 26 يناير ليوم 6 فبراير، وهيكون مفتوح من السبت للأربع من كل أسبوع، من الساعة 10 صباحًا للساعة 8 مساءً، أما الخميس والجمعة فهتكون ساعات العمل من 10 صباحًا لـ 9 مساءً.
هتزور المعرض امتى؟ وإيه الكتب اللي قررت تشتريها من هناك؟ ولا لسه هتروح وتشوف الكتب الموجودة؟ سيب لنا ردك في التعليقات.