دايمًا لما بنيجي نتكلم على تشوه صورة الجسد والأضرار النفسية السيئة اللي بتنتج عن وجود beauty standards المفروضة علينا من المجتمع، دايمًا بنلاقي الكلام موجه أكتر للستات، ودايمًا الرجالة هما اللي بينتهي بيهم المطاف منسيين في الأنواع دي من النقاشات، رغم إنهم بيعانوا من نفس المشكلة، ببساطة لإن تشوه صورة الجسم في نظر الشخص، مش مشكلة بتقتصر على gender معين. علشان كده جيه الوقت إننا نخاطب الرجال بالذات، بخصوص النوع ده من المشاكل.
لإن الرجال بطبيعة الحال بيتشافوا إنهم أقوية وعندهم tough exterior، فقليل لما بنلاقي الضوء بيتسلط على نوع معين من المشاكل والتحديات النفسية اللي ممكن يكونوا بيتعرضوا لها، لكن ده لا ينفي وجودها ووجود الـ struggles بتاعتهم أثناء مواجهتها. زيّهم زيّ الستات، بيتم التنمر عليهم ووضع ضغط، لكن الاختلاف إن مش كتير بيُتاح الفرصة ليهم يتكلموا عن الموضوع ده. الرجال عندهم مشكلة وضغط اجتماعي من ناحية شكل الجسم المثالي.
“فورمة الساحل” اللي تعبير بنستخدمه كنوع من أنواع الهزار، ده بيبقى فعلًا كابوس بالنسبة لكتير من الرجال. بنلاقي البعض بيقضي وقت كبير في الجيم وبيتبع نظام غذائي قاسي، بس علشان يـ follow مواصفات الفورمة دي. ودي مش مبالغة ولا هزار، دي حقيقة بيعيشها كتير من الرجال، خصوصًا اللي في سن المراهقة، واللي بيكونوا عرضة أكتر للتأثر للنوع ده من الضغط. عضلات البطن أو الـ ABS بقى حاجة على أساسها بيتم تحديد جسم الراجل كويس وصحي ولا لأ.. على أساسها بيتم تحديد الشخص worthy ولا لأ.
حاجات زيّ وجود دقن وعضلات قوية وقامة طويلة بتتشاف إنها عوامل أساسية علشان يتشاف الشخص إنه “راجل بجد” يستحق يتقال عليه أو يتشاف إنه جذاب، وبالتالي افتقار الشخص لأي من العوامل دي معناه التقليل من رجولته أو شكله، لإنه ببساطة مش fitting into the criteria بتاعة الفورمة المثالية!
زيّ ما بنشجع البنات والستات إنهم يحاربوا النوع ده من الضغط وتقبل جسمهم زيّ ما هو أيًا كان شكله، لازم كمان نشجع الرجال يحاربوا نفس المشكلة دي، لإنها genderless. لازم كلنا كبني آدمين (سواء راجل أو ست) إننا نفكر في كلامنا وتعليقاتنا قبل ما نقولها ونأثر بيها على ثقة الآخرين. لازم نبطل نشوف نوع الميمز اللي بيقول إن الراجل لو أقصر مني يبقى ماينفعش، أو إن الرجال من غير دقن شكلهم زيّ الأطفال.. لازم النوع ده من المحتوى السام يتوقف، ببساطة لإنه بيأثر بالسلب على نفسية الرجال.