كتير مننا مايعرفش إن الملح ليه استخدامات تانية كتير غير استخدامه كنوع من أنواع التوابل علشان نظبط الأكل بيه، لو دورنا شوية هنلاقي إن مش بس الملح اللي ممكن نطلع منه استخدامات تانية، ده أي حاجة في حياتنا عمومًا مش بس في الأكل، حتى فرش الأسنان والمعجون ممكن نستخدمهم بأكتر من استخدام. علشان كده جبنا النهارده استخدامات مختلفة للملح ممكن تجربوها وهتوفر عليكم كتير.
- لو حطينا شوية منه على الزيت قبل ما يتغلي، هيمنع ” الطرطشة” اللي بتحصل وقت ما بتحط أي أكل.
- ملح مع نص ليمونة بيتم فركها على أى حاجة نحاس بيقضي على أي صدا.
- ممكن نستخدمه مع عصير الليمون علشان ننضف البيانو.
- لو اتحط مع المياه وبقى محلول ممكن نستخدمه للورد علشان يعيش مدة أطول.
- بيمنع النمل لو رشينا في المداخل، وأي مكان جانبي.
- كسر المكسرات بسهولة، لو نقعنا اللوز والبندق والجوز في مياه وملح لكام ساعة، هيبقى سهل إزالة القشرة الخارجية.
- بيهدي من لسعة النحلة، لو اتحط على مكان اللسعة.
- إزالة البقع، سواء السجاد أو الهدوم، بإننا نرش الملح على البقعة ونسيبها لمدة لحد ما تمتصها وبعدين نغسلها بمياه باردة.
- المحلول بتاعه يقدر يحافظ على نضج الفاكهة لأطول وقت ممكن ويمنع تلفها وتحويلها إلى اللون الأسود.
- لو اتحط في أي حذاء وسبناه شوية، هيشيل أي ريحة كريهة.