قوية ومستعفية وقادرة وصاحبة شخصية في أدوارها، كانت تدخل أي خناقة تجيب آخرها، عايشة رحلة مع الخناقات والانتقامات مابتنتهيش، غادة عبد الرازق نجمة من نجمات الدراما المصرية، ولإنها كانت بتحب دايمًا تدخل في منطقة من الأدوار معروفة بالقوة والصلابة وحب الانتقام والتخطيط، وأثبتت للجمهور إن أخد الحق صنعة، الجمهور أطلق عليها لقب “المرأة الحديدية”.
هنلاقيها مثلًا في مسلسل “مع سبق الاصرار” في دور المحامية فريدة الطوبجي، ماكانش في قضية بتصعب عليها، بتستخدم كل الحيل علشان تخرج موكلها زي الشعرة من العجينة، لحد ما يقرر شخص إنه يلعب بنفس طريقتها والناس افتكرت بعدها إن فريدة مش هيقوم لها قومة بس على مين.
ومسلسل “السيدة الأولى” زوجة رئيس الجمهورية قدرت بقوتها إنها تحاول السيطرة على الحكم بعد وفاة زوجها، وشخصية مُرة في مسلسل “حدوتة مُرة” .. وكانت فعلًا كده، أي حد يقرب منها كانت بتلدعه، استغلت ظروف كل الناس أسوأ استغلال علشان بس توصل.
وكذلك في شخصية وردة في مسلسل “الباطنية” وردة نص المسلسل كانت بتكبر في السوق وفي الفلوس، وكانت شغالة انتقام على عيلة الحاج العقاد بعد ما ظنت إن ابنها اتقتل.
بداية من “زهرة وأزواجها الخمسة” نهاية بآخر أعمالها “تلت التلاتة” شخصيات غادة عبد الرازق في أعمالها كانت بتتمتع بقدر من الحيل والذكاء والقوة في التعبير عن المشاعر وصلابة كل شخصية بشكل مختلف، مع تقديم كتالوج من الانتقام يخليك متحمس ومنتظر لخبايا الشخصية وتشوف هتتصرف ازاي مع كل دور، بعيدًا عن النمطية في تقديم الست في صورة الرومانسية الحالمة والمقهورة والمغلوب على أمرها.
ولو تابعت فترة التمانينات والتسعينيات هتلاقي إن دور بنت البلد والمرأة القوية كان برعاية نجمات أبرزهم نادية الجندي ونبيلة عبيد، وهنلاقي إن غادة عبد الرازق قدرت تاخد الراية من بعدهم .