نشر موقع الدستور النهارده الأحد خبر إن مصر بتحتل المرتبة التانية على مستوى العالم كأفضل مكان لممارسة رياضة السنوركلينج، على حسب تقييم موقع Tourism Trend البريطاني، المتخصص في السياحة، وبناءًا على تقييمات موقع Sport Cover Direct. والسنوركلينج هو رياضة مائية تشبه الغوص بس بتتم باستخدام أنبوبة تنفس بس، ومش بتغطس ولكن بتفضل قريب من سطح المياه.
السنوركلينج بيتيح لك الفرصة تشوف الشعاب المرجانية والكائنات البحرية اللي بتعيش في المياه الضحلة قرب الساحل، ومن غير ما تضطر تغوص بأدوات معقدة وتحتاج تدريبات خاصة. مصر فيها أماكن كتير جدًا تقدر تعمل فيها سنوركلينج وتشوف عجايب تحت المياه.
تقدر تروح أي مكان من دول في أي وقت من السنة وهيكون وقت مناسب تعمل سنوركلينج، وده بيعتمد على أنت بتحب الصيف ولا الشتاء، وبتحب الجو حر أوي ولا برد أوي ولا نص نص. غالبًا الجو في المناطق الساحلية دي بيكون حر جدًا في شهر يوليو وأغسطس، وأحسن وقت تزورهم فيه في الصيف هو مايو وسبتمبر، وفي الشتاء في أبريل أكتوبر، لإن باقي شهور الشتاء بيبقى الجو تلج أوي هناك.
أماكن مختلفة في مصر تقدر تعمل فيها سنوركلينج وتنبسط
مدينة دهب في جنوب سيناء
البلوهول: عمق الحفرة حوالي 136 متر، وهي منطقة غنية بالشعب المرجانية والأسماك الملونة والنادرة، وكل ما تنزل أعمق تحت المياه كل ما هتشوف حاجات أجمل وأكتر.
منطقة الكوري جاردن أو “إيل جاردن”: في شمال مدينة دهب، ومليانة كائنات بحرية نادرة، غير الشعب المرجانية اللي بتغطي قاع البحر فيها، ورغم إن الغوص هناك تجربة رائعة، إلا إن السنوركلينج هيتيح لك الفرصة إنك تستكشف كتير من بيئتها البحرية المميزة.
أبو جالوم: المحمية بتتميز بالمياه الصافية وتنوع الحياة البحرية وبتتيح فرصة فريدة لعشاق رياضة السنوركلينج إنهم يشوفوا أنواع مختلفة من الأسماك واللافقاريات والقشريات البحرية المميزة، وكمان تقدر تعمل فيها سفاري وأنشطة تانية كتير.
السنوركلينج في طابا:
طابا هي منطقة في شمال خليج العقبة، والساحل بتاعها مليان حياة بحرية نادرة وبيئة هادية، وفيها نوع نادر جدًا من السمك اسمه سمك الضفدع وأنواع مختلفة من حصان البحر واللي مش سهل تلاقيها في البحر الأحمر، وعلشان كده تُعتبر مكان مميز جدًا لممارسة رياضة السنوركلينج.
منطقة القصير
مدينة تابعة لمحافظة البحر الأحمر وموجودة ما بين الغردقة في الشمال ومرسى علم في الجنوب، وبتتميز بالمناطق الضحلة القريبة من الساحل واللي تُعتبر مكان رائع للسنوركلينج، فتقدر تشوف فيها الشعب المرجانية والأسماك الملونة النادرة وبعض الآثار والنقوش الصخرية القديمة اللي غرقت.
مرسى علم
مدينة تابعة لمحافظة البحر الأحمر، وتٌعتبر وجهة ممتازة للسنوركلنيج، بالذات بسبب وجود مجموعة من الشعب المرجانية صغيرة الحجم اللي فيها ألوان كتير جميلة اسمها شعب سان جون. وكمان تقدر تشوف الدلافين الدوارة في محمية وادي الجمال، واللي تُعتبر أكبر تجمع لأسراب الدلافين دي واللي بتخرج كل يوم.
أولًا، لازم نأكد على فكرة إن استخدام كريم مضاد لأشعة الشمس ضروري جدًا وأنت بتعمل سنوركلينج، بالذات بالنسبة للناس اللي بتنسى نفسها بالساعات في المياه زيي، ولإننا بنكون مشغولين جدًا بالفرجة على السمك والشعب المرجانية تحت المياه، بيتعرض ضهرنا لكمية كبيرة من الشمس ممكن تعمل حروق كبيرة.
أخلاقيات السنوركلينج الأمن علشان نحافظ على المحميات الطبيعية البحرية
لما تيجي تعمل سنوركلينج فـأنت بتستمتع بجمال الحياة البحرية في المحميات البحرية المميزة دي، وعلشان نفضل نستمتع بيها لازم نعرف إننا أحيانًا بنعمل حاجات بتبان بسيطة بس ممكن يكون تأثيرها على الحياة البحرية سئ جدًا ومدمر.
خد بالك ماتخبطش في الشعب المرجانية
وأنت بتعمل سنوركلينج، اتأكد إنك مش بتخبط في أي شعب مرجانية علشان أولًا ماتتعورش، وثانيًا ماتتسببش في أي كسر أو تدمير للشعب المرجانية، بالذات إن الشعب المرجانية بتاخد ما بين 10.000 سنة لملايين السنين علشان تنمو وتتشكل بالطريقة اللي أنت بتشوفها تحت المياه دي.
ماتاخدش حاجة معاك، وماتسيبش حاجة وراك
علشان الشعب المرجانية بتاخد آلاف السنين علشان تتشكل، فلما تكسر حاجة منهم وتاخدها معاك لمجرد الذكرى فده بيدمر الحيد المرجاني. فـلو عايز تاخد ذكرى، خد صورة بس، وياريت تحاول ماتسيبش وراك أي مخلفات بالذات البلاستيك، لإن المخلفات بتاعتنا بتبوظ الطبيعة البيولوجية للمحميات اللي بنحبها وبنستمتع بيها.
لو لقيت زبالة شيلها أو بلغ عنها
هتلاقي دايمًا حوالين مناطق السنوركلينج مراكز مسئولة عن نضافة المنطقة البحرية، فلو شفت زبالة شيلها علشان نتشارك كلنا مجهود الحفاظ على المحميات الطبيعية، ولو ماقدرتش تشيل الزبالة دي ممكن تبلغ عنها المراكز المسئولة حواليك.
انصح اللي حواليك
لو شفت حد بيعمل حاجة غلط، ممكن تروح تتكلم معاه وتنصحه وتفهمه ازاي يحافظ على المنطقة، وبالشكل ده هنعمل شبكة كبيرة من المعرفة والتوعية الذاتية.