ازاي السفر ممكن يغير حياتك وشخصيتك؟ والدراسات بتأكد الكلام ده
بواسطة: ساره علي
لو بتحب السفر خليك جاهز للتغيير.. مين مش نفسه يسافر ويكتشف العالم والثقافات المختلقة. أغلب الناس بتحب ونفسها تسافر وتعمل ذكريات وتاخد صور في أماكن جديدة. بس الدراسات أثبتت إن السفر مش بس صورة وذكريات. في بحث أجراه علماء الاجتماع في جامعة رايس، وجامعة كولومبيا، وشمال كارولينا إن السفر بيخليك تعرف وتفهم نفسك أكتر وبيأثر في شخصيتك وحياتك وطريقة تفكيرك. أما بقى لو مسافر لمدة طويلة، فأنت ممكن تودع شخصيتك القديمة.
ازاي السفر ممكن يغير شخصيتك؟
السفر فرصة علشان تقابل ثقافات مختلفة وناس جديدة. بيسمحلك إنك تعيش تجارب غريبة عنك، فيها الحلو والوحش. بس الأكيد إنك هتستفيد وتتعلم من الاتنين. وكل ده بيخليك تبص للعالم من منظور تاني غير اللي أنت متعود عليه، وبالتالي تعاملك مع المواقف والتجارب دي هيخليك تفهم نفسك أكتر. مثلًا هتقيم المواقف بشكل مختلف وحتى رد فعلك عليها كمان هيختلف عن الأول. مشاكلك هتبصلها من زاوية تانية وبالتالي هتعالجها بطريقة مختلفة. مثلًا مش هتشتت تفكيرك عن الحاجات اللي بتسببلك مشاكل، هتقرر تواجه وتتقبل وتستعمل التغيير ده للأحسن في حياتك.
مفيش حاجة هتوقفك تاني!
وعلشان السفر بيخليك تبص من منظور تاني للحياة، فالأحداث اللي بتتغير في حياتك وخصوصًا لو كانت بشكل سلبي مش هتوقفك تاني. فمع الوقت بتدرك إن الحياة مُتغيرة وإن الأحداث ممكن تمشي عكس اللي أنت مخطط له. فسواء للأسوأ أو للأحسن، فرد فعلك وتعاملك معاها هو اللي بيأثر عليك وعلى طريقتك مش العكس. فالناس اللي بتسافر كتير مش بتسيب التغيرات اللي بتحصل لهم هي اللي تتحكم فيهم بالعكس، بيستمروا وبيتقبلوا فكرة التغيير.
السفر والإبداع
السفر بيبعدك عن دايرة الأمان (Comfort zone) اللي أنت متعود عليها ذهنيًا وجسديًا, وده بيساعدك تلاقي أفكار جديدة برا الصندوق زيّ ما بيقولوا. فبيساعدك إنك تبعد عن الضغوط لفترة وتريح عقلك، وده بيجدد طاقتك من تاني. فبتكون منتج أكتر. ده غير تعاملك مع الثقافات المختلفة اللي بيأثر عليك وبيوفرلك طرق جديدة للتفكير من كذا منظور.
ازاي السفر بيظهر جانب مختلف في شخصيتك
علشان كل الأسباب اللي فوق، فالسفر بيظهر جانب تاني من شخصيتك ماكنتش تعرفه. فأنت بتتعامل مع مواقف ممكن تكون أول مرة تتعرض لها. فبالتالي بتكتشف حاجات جديدة في نفسك. وكمان التجارب الانتقالية زيّ الطلاق أو تغيير المهنة ممكن تقلل من وضوح فهم الذات. أما السفر فهو على العكس من التجارب الانتقالية اللي بتزود من فهم الذات. خروجك برا دائرة الأمان بيكسر الحواجز اللي ممكن توقفك. فبمجرد تخليك عن الحواجز أو إنك تغلبها عن طريق حاجات جديدة حتى لو بتخوفك أو بتحسسك بعدم الراحة، فأنت بتسمح لنفسك إنها تطور لنسخة أكتر خبرة.
وبالتعامل مع ثقافات مختلفة، فأنت بتتبنى طرق جديدة بتشوف من خلالها العالم. كمان بتبدأ تشوف إن في طرق كتير للعيشة غير اللي أنت متعود عليها. الثقافات المختلفة ليها عادات وقيم مختلفة على نفس القدر من الأهمية زيّ عاداتك وتقاليدك. وده بيساعدك إنك تكون أفكار جديدة وبيحسن من تعاملك مع الاختلاف بشكل عام. وبعد كل ده فأيوة أكيد السفر ممكن يغيرك لشخص ناضج أكتر. طبعًا السفر حاليًا صعب في وسط أزمة الكورونا وأهم حاجة سلامتك الصحية بس مفيش مانع لو سافرت جوا بلدك، أكيد في أماكن كتير لسه مازورتهاش وطبعًا ده مع كل الاحتياطات اللازمة.