سوق الجمعة هو عبارة عن سوق ضخم جدًا في منطقة التونسي بالسيدة عائشة بحي الخليفة، في مصر القديمة. بيتكون السوق من مجموعات كبيرة من التُجار اللي بيعرضوا بضاعتهم في عِشش من الخوص والجريد، أو بيفرشوا بيها في الشارع. بضاعة سوق الجمعة بتشمل كل حاجة، ممكن تلاقي أي حاجة تتخيلها، “من الإبرة للصاروخ”. في ناس بتبيع أنتيكات وخردة وهدوم وماشية وطيور وحيوانات برية زيّ التعالب والخفافيش، وزواحف زيّ التعابين والتماسيح.
محافظة القاهرة أخدت قرار بقفل سوق الجمعة ومنع تجارة الحيوانات البرية بسبب خطورتها واللي كانت سبب في انتشار وباء الكورونا في العالم كله.
تجارة الحيوانات البرية منتشرة في أماكن كتير من العالم وبالذات في الصين اللي المطبخ فيها بيحتفل بأطباق كتير بتستخدم الحيوانات البرية. في نظريات كتير بتقول إن فيروس الكورونا اللي نشأ في الصين كانت بدايته في أسواق الحيوانات البرية.
تجارة الحيوانات البرية في الأسواق من خلال حبسها في أقفاص ضيقة وتجميعها مع بعض في مناطق مزحومة بالبشر والحيوانات ساعد على نقل فيروسات مختلفة ما بين أنواع مختلفة من الحيوانات ومنها انتقلت الفيروسات دي للبشر، خلال عملية تنقل الفيروسات ما بين الأنواع المختلفة من الحيوانات والبشر كانت بتتطور وبتتأقلم مع كل نوع جديد لحد ما بقى عندنا فيروس الكورونا اللي سبب وباء قضى على أعداد كبيرة جدًا من البشر وكان ممكن يبقى طاعون عالمي ويسبب ضحايا أكتر بكتير.
قرار منع تجارة الحيوانات البرية كان قرار صح جدًا ومهم وبنقدم دعمنا الكامل لمحافظة القاهرة على القرار ده، لكن لما سمعنا إن القرار شمل إغلاق سوق الجمعة تمامًا، سألنا نفسنا عن التُجار اللي بيعتمدوا في أكل عيشهم بالكامل على تجارتهم في سوق الجمعة، هل الناس دي كده خلاص، مالهاش أكل عيش تاني وتجارتها باظت؟
رأي المحافظة في أسباب غلق سوق الجمعة
تواصلنا مع مصدر خاص في محافظة القاهرة وسألناهم عن القرار ده. قالوا لنا إن المحافظة منعت تجارة الحيوانات البرية تمامًا وقفلت السوق اللي في السيدة عائشة فعلًا لكن في سوق جديد على بُعد كيلو متر واحد اتبنى في منطقة التونسي، والمحافظة وفرت فيه مؤسسة تسويقية كاملة بمساحات كبيرة للتُجار علشان يعرضوا بضاعتهم، ومركز للشرطة ونقطة مطافي مستعدة دايمًا علشان يمنعوا السرقة والحرايق اللي كانت بتسبب خسارة بضاعة كتير للتُجار.
قال مصدرنا في المحافظة إن السوق الجديد هتتوفر فيه حمامات وكافتيريا علشان تخدم التُجار والزباين اللي بيترددوا على السوق وكمان هيكون في كاميرات مراقبة علشان مركز الشرطة يقدر يراقب السوق طول الوقت.
إيه رأي التُجار في قرار المحافظة؟
نزلنا منطقة السوق القديم، اللي عايش فيها معظم تُجار سوق الجمعة، علشان نقدر نتواصل مع التُجار ونعرف رأيهم في قرار المحافظة وتأثيره على شغلهم.
اتكلمنا مع تُجار كتير وكان معظمهم سعيد جدًا بالقرار وقالوا إنهم استلموا المحلات التجارية، المتشطبة بالكامل، في سوق التونسي الجديد، واستلموا عقود الملكية وإن المُحافظة وفرت عربيات مجانية ساعدتهم في نقل بضاعتهم للسوق الجديد.
مالقيناش أي شكاوي أو مخاوف من التُجار بخصوص عملية نقل السوق وكانوا متحمسين جدًا للقرار لحد دلوقتي. وهننزل تاني خلال يوم الجمعة اللي جايه، في أول يوم لإقامة السوق في مكانه الجديد، علشان نتابع مع التُجار والزباين شغل السوق الجديد في أول يوم ونشوف الوضع هيبقى عامل ازاي، وإذا كان في أي مشاكل أو شكاوي سواء من التُجار أو من الزباين.