قلق وأخبار عن تويتر من وقت الكلام عن صفقة “إيلون ماسك” والأزمات اللي بيواجهها تويتر من وقت استحواذ ماسك وتوجهاته الجديدة اللي بيفرضها على تويتر، وبالتالي كمان ردود فعل الناس اللي بتستخدم تويتر كانت مختلفة، الأزمات اللي حصلت في خلال شهر واحد من استحواذ إيلون ماسك كانت كتير وكمان كانت أزمات مصيرية، هنتكلم فيها بالتفصيل.
ضريبة على الحسابات الموثقة
دي كانت أكتر حاجة أثارت الجدل بين المستخدمين لتويتر وخصوصًا المشاهير، وباختصار، تويتر أعلن عن النية في فرض رسوم 8 دولار شهريًا للحسابات الموثقة، مقابل الاشتراك بـخاصية “تويتر بلو” الجديدة، وللحفاظ على علامة التوثيق.
هنا الناس كان رد فعلهم عنيف شوية، وفي مشاهير لغوا حسابهم على تويتر زي الممثلة “آمبر هيرد” والناس بشكل عام انتقدت الفعل ده وشايفين إنه طمع شوية من الملياردير إيلون ماسك، لدرجة إن هو نفسه نزل تويت إن الناس مستخسرة تدفع فلوس علشان توثيق حسابها لكن بتدفع نفس الفلوس في كوباية قهوة.
حرية التعبير على تويتر
ناس كتير بتعتبر تويتر من أكتر المواقع اللي بيكونوا على حريتهم فيه على السوشيال ميديا، بيعتبروه مساحة آمنة كده وبيلاقوا فيه ناس شبههم وبيتشاركوا آراءهم، غير إنهم بيتعرضوا لآراء مختلفة من أماكن في العالم كله.
الحقيقة الثابتة دي بالنسبة لهم بقت في خطر من بعد ما تويتر بقى في قبضة إيلون ماسك، وحاسين بعدم حرية بشكل أكبر خصوصًا بعد الأخبار المتتالية، اللي هما شايفينها ضد مصلحتهم وضد مصلحة تويتر نفسه، وإن كل هدفها التقييد وجمع الفلوس بس.
تسريح موظفين
من المسامير اللي اتدقت في نعش تويتر، لما انتشرت أخبار عن إن شركة تويتر قامت بتسريح أو طرد عدد مش قليل من الموظفين فيها، العدد الفعلي مش معروف لحد دلوقتي والأقام متباينة، لكن في إشارة من مصادر كتير إن العدد وصل لحوالي 50% من موظفين تويتر كلهم، والشركة قالت: “نحن ندرك أن هناك عددًا من الأفراد الذين قدموا مساهمات ملحوظة في تويتر سيتأثرون، لكن للأسف هذا الإجراء ضروري لضمان نجاح الشركة في المستقبل”.
الفكرة نفسها فتحت النار على تويتر سواء من المستخدمين في العالم كله أو من الموظفين في تويتر، اللي سبقوا الأحداث ورفعوا دعوى قضائية جماعية قالوا فيها إن الشركة كانت بتتحرك بسرعة كبيرة، بحيث لا يمكن استبعادهم من غير سابق إنذار، وده انتهاك للقانون الفيدرالي وقانون ولاية كاليفورنيا، وبعدها تم الإبلاغ عن تفاصيل تسريح العمال في اليوم اللي بعده على طول.
هروب المستخدمين
بعد كل ده، تويتر شهد هجرة كبيرة لمستخدمين فيه، وحسب تقرير لـ CNN الأيام دي اكتسبت منصة Mastodon -المنافسة لتويتر مؤخرًا- حوالي 230 ألف مستخدم جديد، تحديدًا من يوم إعلان إيلون ماسك استحواذه على تويتر.
ده غير مشاهير عالميين أعلنوا إنهم هيغادروا تويتر بشكل كامل بعد الأحداث الأخيرة دي، ومشاهير خسروا متابعين بأعداد كبيرة على حساباتهم على تويتر، وده بيشير لإن في أشخاص كتير قفلوا حساباتهم أصلًا.
يعني على سبيل المثال، فقدت المغنية المشهورة “كاتي بيرى” أكثر من 200 ألف متابع على تويتر بعد الإعلان عن استحواذ إيلون ماسك على الموقع، ده غير حساب الرئيس الأمريكي الأسبق “باراك أوباما” اللي حسابه خسر حوالي 300 ألف متابع.
كل الأحداث دي فتحت المناقشة عن حرية الرأي اللي بيزعم ناس كتير إنهم مؤيدين لها لكن تصرفاتهم بتثبت العكس، ومدى استخدام مواقع التواصل الاجتماعي بشكل يعبر عن الناس وأفكارهم ويقربهم من بعض، ولا الاتجاه السائد في المكسب بس؟
آخر كلمة: ماتفوتوش قراءة: دوائر تويتر: لغة الحوار وتأثير السوشيال ميديا عليها بين آراء مختلفة