في مصر، انطلقت منصة “صوت 50 مليون امرأة أفريقية” لدعم التواصل بين أصحاب المشروعات الصغيرة ورائدات الأعمال في 38 دولة في أفريقيا، علشان تسهّل التعاون بينهم وتجمعهم كلهم في مكان واحد، وده من ضمن الخطط والإجراءات اللي بتقوم مصر بتنفيذها لدعم وارتقاء مكانة المرأة ودورها في المجتمع في كل المجالات، على المستوي الوطني والأفريقي كمان.
المنصة هي الأولى من نوعها اللي بتربط 50 مليون امرأة في مجال الأعمال التجارية داخل 38 دولة أفريقية، وهتساهم بشكل كبير في تسهيل نقل الأفكار والمعارف والمعلومات بين صاحبات المشروعات ورائدات الأعمال في كل أنحاء أفريقيا، ده كمان هيساعد بشكل كبير في تعزيز التواصل بين الدول الأفريقية بقيادة مصر اللي دايمًا رائدة في القارة.
والمنصة تم إطلاقها بتنظيم من جهاز تنمية المشروعات الصغيرة ومتناهية الصغر، بالتعاون مع مجموعة السوق المشتركة لشرق وجنوب أفريقيا “الكوميسا”، وتحت رعاية وزيرة التجارة والصناعة والرئيس التنفيذي لجهاز تنمية المشروعات نيفين جامع، وحضرت احتفالية الانطلاق دكتورة مايا مرسي رئيس المجلس القومي للمرأة.
كمان المنصة مش هتكون مجرد سوق للسيدات في مصر لعرض المنتجات الخاصة بيهم أو التواصل مع اللي بيقوموا بعملية الشراء، ولكنها هتبقى مركز بيتيح المعلومات اللي بتمكنهم من الوصول للخدمات المالية والتدريب على إدارة الأعمال ومحو الأمية المالية.