أهداف رمضانية تفوق إمكانيات وقدرات “اسند الولية”

مع دخولنا على بداية الشهر الكريم، في بعض الناس بتبقى مأجلة أحلامها وطموحاتها من هي وفي اللفة للشهر ده، وللأسف في منها أهداف خارقة للطبيعة، والشخص بيعقدها ويصعبها على نفسه وبيجي آخر الشهر يعيط بعد ما قعد يكتب قائمة طويلة عريضة من الأهداف، وبيبقى عارف وكلنا عارفين بس مخبيين عليه أن مش هيحقق منها حاجة، والنهارده احنا مش هنعمل فيها دكاترة نفسيين ونقولك تحققها ازاي لإننا نفسنا مش عارفين ازاي، فعلشان كده احنا جايين نقولك ونقول لنفسنا: ماتصعبهاش على نفسك لأننا بينطبق علينا مفهوم “اسند الولية”.

مش هتخس يا خلف

مع احترامنا لطموحاتك بس مش هيحصل، يعني أنت سايب شهور السنة كلها وجاي على الشهر اللي بيتعمل فيه كنافة وقطايف وافتكاسات الحلويات من المدلعة للمهشتكة وأكتر شهر الناس بتستهلك فيه كمية حلويات، وتيجي بقلب جامد وتقول عايز أخس؟ إيه الجبروت ده يا شيخ، الفكرة أنك لو عزمت القرار ممكن تيجي على أول يوم وتضعف قدام صباع المحشي وهتلاقي واحد بيجيب التاني علشان متكسفش خالتك وتتهمك اتهامات باطلة “أنت مش عاجبك أكلنا ولا إيه” فتاكل واللمة أنت عارف بتأكل.

مش هتلحق تشوف كل المسلسلات

#ودع_اجازتك_في_تويتايه ملحقتش ادلع نفسى .. اقسم بالله ?? pic.twitter.com/HnIt6LbMth

— ناضا (@naDa_nasser1911) September 24, 2016

في ناس طموحها بيوصل إنها تعمل أول يوم رمضان جدول مسلسلات وبرامج بمواعيدها ومظبطينهم ولا أجدعها جدول ثانوية عامة، وتلاقي دي نفس الناس اللي عمرها ما عملت في حياتها جدول حتى في المذاكرة، ومش عارفين الصراحة جايبن الثقة دي كلها منين، أنت حتى لو قررت تشوف نصهم الإعلانات هتكرهك في عيشتك وتلاقيك نمت على نفسك من كتر الزهق علشان تصحى تعيد اليوم من أوله خصوصًا لو كنت موظف بائس، ولو عرفت تعدي من كل ده وتعمل باقة، أحب أقولك أن لا باقتك ولا لياقتك هيسمحوا لك بده، فخليك في الخفيف كده وعلى قدك.

لازم نفطر يوم مع بعض؟

مش هنبطل نقول الكلمة دي بقى؟ مازهقناش طيب؟ من قبل رمضان واحنا بنخطط هنشتري قفطان وعبايات رمضانية علشان نعيش في الأجواء ونخرج بيها ونقضي “رمضان نايتس” بس للأسف رمضان بيعدي من غير ما نشم ريحة ليالي رمضان.. مش علشان معناش فلوس بس مش قادرين والله، السنة الجاية بقى وعلينا وعليكوا خير.

هظبط نومي

انا بعد ما قولت هنام بدري النهارده.. pic.twitter.com/r9Ke7tYWZg

— i meme it (@egymeme11) March 30, 2021

أهي دي أكتر جملة مش راكبة على بعضها، في رمضان وعايز تظبط نومك؟ من أي اتجاه؟ يعني لو قررت تنام بدري، صوت البومب والصواريخ هيصحيك، هتصحى علشان السحور، هتصحى علشان الناس أصلًا مش بتعمل حاجة في رمضان غير إنها تصحى، هتصحى علشان قلبك مش هيجيبك تنام وتسيب الأجواء الحلوة دي، ولإنه معروف إننا بنسهر في رمضان وبندخل على غيبوبة النوم في العيد علشان نعوض، فأرفع شعار بعد العيد من سكات وربنا يقدرنا على بعد العيد.

الأباجورة دي حرام

الروحانيات مهمة وكلنا بنتمنى نوصل لمستوى أعلى بكتير من اللي احنا فيه بس مين قالك أنك لو فضلت طول السنة لا تصلي أو تعمل أي عمل ديني، هينزل عليك الوحي في أول يوم رمضان وتصلي الفروض والتراويح وقيام الليل وتختم القرآن أربع مرات، لدرجة توصل بيك أنك تقول إن الأباجورة دي حرام، الطموح حلو بس مشيها على قدك شوية شوية، واسمع كلام متخصصين أحسن.

وآخر حاجة حابين نقولها علشان يبقى عملنا اللي علينا، ماتنساش أن الوقت بيجري بسرعة في رمضان، ولو عايز تعمل حاجة يادوبك تلحق تخطط، واحنا عارفين أن بعد ما تقرأ الكلمتين دول هتخش تريح شوية وتشد البطانية يا عديم الإرادة، ويارب احمينا من نفسنا ومن القرارات التي لا تتناسب مع صحتنا.

آخر كلمة: ماتفوتوش قراءة: احترس من كلمة “كل سنة وأنت طيب” بها سم قاتل