الأطفال ممكن يعبروا عن نفسهم بطرق مختلفة كتيرة، وده مهم جداً دلوقتي أكتر من أي وقت فات علشان يقدروا يعبروا عن مشاعرهم في ظل ظروف العزل الاجتماعي والحجر الصحي.
إحنا جبنا أنشطة متنوعة ممكن تساعد كل الأعمار، بما فيهم البالغين، في التعبير عن احاسيسهم، وده شرح مبسط ليها:
أنشطة التعبير عن المشاعر
- أرسم مشاعرك: الفئة العمرية (من فترة الحضانة للمدرسة الإعدادية).
- بعض الأطفال عندهم موهبة وحب الرسم، إديهم كل الأدوات اللي تقدر تجيبها وأسألهم أسئلة علشان تشجعهم يرسموا، زي مثلاً: إيه هو شكل فيروس الكورونا في خيالك؟ لو فيروس الكورونا إنسان شايفه هيكون شكله عامل ازاي؟ ارسم المكان اللي إنت عايش فيه في البيت، ممكن تكون أوضة نومك أو الصالة اللي تحبه، وإرسمها كأنك لسة واصل حالاً للمكان.
- طلع كل اللي عندك من ألوان وأقلام وصلصال واستخدمه.
- الرسم هيخلي الأولاد يستوعبوا الخطر اللي بيكون صعب عليهم فهمه، لأنهم في الحالة دي بيدوله شكل مادي فبيكون حقيقي قدامهم وده بيساعد على وصول المعلومة بشكل أوضح.
- أكتب مشاعرك: الفئة العمرية (مرحلة المراهقة والمرحلة اللي قبلها).
- بعض الأطفال بيفضلوا الكتابة عن الكلام، إديلهم دفتر يكتبوا فيه لو هما مش عندهم، واستخدم الجمل التحفيزية دي علشان تساعد عقولهم المبدعة تشتغل:
- القعدة في البيت أكتر ليها……
- أنا ممتن لـ……
- إيه هو إحساس القعدة في البيت في الوقت ده.
- ممكن بردو تطلب منهم يكتبوا رسالة شكر للناس اللي مضطرة تشتغل في الوقت ده (الدكاترة والممرضات، اللي شغالين في محلات البقالة، موظفين البنوك، وهكذا). وإنت ممكن يكون عندك حد من عيلتك بيشتغل في مهنة من دول وبالتالي ممكن تعبر رسالة الشكر عن امتنان الطفل ليهم بشكل شخصي.
- وممكن يكتبوا جواب للمدرس بتاعهم يقولوا فيه اللي واحشهم واللي مستنين يعملوه بعد الفترة دي.
- سجل مشاعرك: الفئة العمرية (كل الأعمار).
- هما ممكن يسجلوا اللي عملوه في يومهم، واللي كانوا حاسين بيه طول اليوم، ويحطوا كل أفكارهم دي في فيديو.
- والمهم هنا إنك تلاقي الوسيلة اللي هتخلي أولادك يعبروا عن نفسهم، فعندك مثلا بيونسيه هي واحدة من أكتر الناس اللي بتشجع على النوع ده من التعبير عن الذات وبتستخدم كاميرا على الكمبيوتر بتاعها والدفتر اللي بتسجل فيه أفكارها.
أنشطة تعليم النظافة الشخصية للأطفال
أصنع محتوى مرئي عن طريق استخدام تليفونك في تصوير المواقف اللي لازم يغسل فيها إبنك إيده. خليه يشارك معاك في تصويرها، وعلقها في أوضة نومه أو على التلاجة أو في أي مكان يقدر يشوفها فيه وتفكره بغسيل إيده.
- إنت تقدر تعمل كده مع الأطفال اللي سنها صغير عن طريق عمل محتوى مرئي إرشادي يوريهم إزاي يغسلوا إيديهم خطوة بخطوة.
كلم اصدقائك خلال فترة الحجر الصحي
هل بيلعب أطفالك مع أصحابهم على النت؟ من المهم جداً إنك تخلي أولادك يتفاعلوا مع أصحابهم في الوقت اللي إحنا بنمارس فيه التباعد الاجتماعي. وفي ألعاب كتيرة جداً يقدروا يلعبوها وهما بيعملوا فيدو شات مع أصحابهم، واحنا جبنالكم شوية أفكار:
- خلي أولادك يرتبوا معاد للغذاء مع أصحابهم، وبالطريقة دي هيقدروا ياكلوا مع بعض ويتكلموا سوا عن اللي بيعملوه في البيت.
- في ألعاب كتيرة ممكن يلعبوها سوا وهما على التليفون زي لعبة Hangman أو تخمين الكلمات.
- وممكن يلعبوا ألعاب مفيدة ومُسلية على الإنترنت سوا زي (Pictionary, Charades, Heads up) ودول كلهم ليهم أبليكيشنز على التليفون.
- خلي أصحابهم يشاركوهم في الاحتفال بأعياد الميلاد والتخرج عن طريق إنك تخطط مثلاً لمكالمات فيديو بيظهر فيها أصحابهم وهما معاهم بوسترات أو كروت كاتبين عليها كلمات لطيفة للشخص اللي بيحتفلوا بيه.
الألعاب العلاجية اللي ممكن تلعبها في البيت
أعمال فنية من قشر البيض
كل اللي هتحتاجه هو:
- القشر بتاع من 6 ل12 بيضه، ويكون مغسول ومتنشف كويس.
- ورق، أو نموذج مطبوع للرسمة لو عندك أطفال صغيريين علشان يقدروا يرسموا الشكل بطريقة أسهل.
- طلاء وتباشير وأقلام ماركر.
- صمغ
الطريقة اللي هتستخدمها:
- خطط للشكل اللي إنت عاوز تطلعه عن طريق إنك ترسمه بشكل عام، وعلشان تسهل الموضوع على نفسك ممكن تستخدم جوجل في الحصول على نماذج للتلوين.
- لون أغلب الخلفية بالطلاء أو الطباشير بحيث إنك تسيب جزء فاضي لقشر البيض.
- لون قشر البيض من جوا بالألوان اللي تحبها وسيبها شوية علشان تجف.
- بعد ما ينشفوا إكسر قشر البيض لأجزاء أصغر.
- وابتدي استخدام الصمغ علشان تلزقها.
التنفس من البطن
لما بنكون مدايقين ضربات القلب بتزيد والتنفس بيكون صعب، ولما بناخد نفس عميق بتتبعت رسالة للمخ إنه يهدى ويسمح للقلب إنه يرجع يدق بمعدله الطبيعي.
- التنفس بعمق بيعيد تشغيل الجهاز العصبي المركزي وبيساعدنا إن إحنا نتعامل بذهن صافي أكتر. وعلى الرغم من إن التنفس مش هيوقف نقاش أو شعور بالغضب، إلا إنه ممكن يهدي عاصفة مشاعر سلبية بشكل أسرع.
- الخطوة الأولى: خلي أولادك يتنفسوا بشكل طبيعي وإسألهم لو بيلاحظوا الزفير وهو بيخرج من جسمهم وحركة بطنهم. إسألهم إيه هو إحساسهم لما بيتنفسوا، وإيه هي اعضاء جسمهم اللي شايفين إنها بتتحرك مع نفسهم.
- الخطوة الثانية: دلوقتي خليهم يناموا على ضهرهم، ويريحوا عضلاتهم، ويحطوا إيديهم على بطنهم (بالنسبة للأطفال الصغيرين استخدم الدبدوب او اللعبة بتاعتهم علشان يكون شريكهم في نشاط التنفس)
- الخطوة الثالثة: خليهم يقفلوا فمهم ويتنفسوا على أربع عدات بحيث إنهم يملوا بطنهم بالهوا وبعدين يكتموا نفسهم لأربع ثواني.
- الخطوة الرابعة: ساعد إبنك في إنه يخرج النفس ببطئ لحد ما كل الهوا اللي كان جواه يخلص.
- نصيحة: لو إبنك بيواجه مشكلة في إنه يطلع الزفير ببطئ خليه يتخيل إنه بيستخدم أدوات غطس أو استخدم شفاطة علشان يطلع الهوا من خلالها.
- الخطوة الخامسة: اتكلم مع إبنك وإسأله إذا كان لاحظ بفرق في جسمه بعد تمرين التنفس، وحاول تخليه جزء من روتين إبنك اليومي. والبعض بيعملوه في نص اليوم وفي ناس تانية بتعمله قبل النوم.
إزازة البريق (الجليتر)
- هي وسيلة رائعة لتهدئة طفلك لما يكون متعصب أو قلقان، وبتساعدهم إنهم ينظموا مشاعرهم.
- النشاط ده بيستخدموه كوسيلة للدعم الحسي البصري بالنسبة للأطفال في سن الحضانة، ولكنه فعال مع الأطفال في المرحلة الابتدائية والإعدادية بردو.
- إنت بتستفيد من النشاط ده بشكل مرئي عن طريق إنك بترج الأزازة فبينتشر الجليتر فيها على شكل عاصفة وبالتالي بتشرح إحنا ليه ساعات بنحس بعاصفة جوانا، واستخدم الإزازة دي كوسيلة تساعد بيها نفسك أو طفلك إنه يهدي عاصفة الجليتر اللي ممكن تحصل في جسمه وعقله وقت الغضب والتوتر.
إيه اللي هتحتاجه:
- إزازة شفافة
- صمغ شفاف
- جليتر، وممكن لو مش عندك تستخدم الرمل أو قصاصات الورق الملونة
- صبغة طعام (اختيارية مش ضرورية)
- مياه دافية
طريقة عملها
- الخطوة الأولى: إملى إزازتك بعبوة الصمغ الشفاف وعبوة جليتر
- الخطوة الثانية: إملى الإزازة بالمياه الدافية (كل ما زادة المياه كل ما كان الجليتر بيهدى أسرع، وكل ما زاد السمغ كل ما كان هدوء الجليتر أبطأ)
- الخطوة الثالثة: حرك الإزازة لحد ما كل المكونات تتمزج ببعضها. حطها على الترابيزة قدامك وشوف الجليتر وهو بيستقر في القاع.
- ده نشاط سهل جداً ورائع لتهدئة الأعصاب والتخلص من القلق، وممكن تحطة في ركن هادئ عندك، أو في أوضة إبنك لما يكون محتاج يهدأ من أي مشاعر سلبية.
- استخدم الوسيلة دي لما تكون هادئ علشان لما تكون مخنوق بمشاعر كتيرة ومتلغبطة ممكن تساعدك في إنك تركز على الجليتر وهو بيهدأ بدل ما تركز على مشاعرك.
أنشطة أخرى
- Vision board: وهي لوحة بتحط عليها أفكارك وخططك وأحلامك.
- Self-reflection journal: وده دفتر بتكتب فيه إنطباعاتك وأراءك وأفكارك بخصوص الأحداث اللي بتواجهها.
- Bullet journalling: وهنا بتكتب بتحاول ترتب أولوياتك وبتكتب الحاجات اللي محتاج تعملها.