في مطابخنا العربية، هتلاقي تنوع غريب في الأكلات والوصفات، ولو المكونات هي هي، هتلاقي دايمًا في حاجة مختلفة وليكن التوابل، أول ما تدوق الأكلة تعرف هي جاية من ومن أنهي منطقة وتبع أنهي ثقافة.
والغريب إن الموضوع ماوقفش عند الوصفات، لأ ده كمل لأسماء الوصفات كمان، مش مجرد اسم والسلام، ده كل اسم له قصة وحكاية، وعلى قد ما كانت القصة اللي ورا تسمية الأكلة بسيطة لكن هتلاقي القصص دي طلعت أسماء غريبة، وللوهلة الأولى تقول إيه علاقة اسمها بالأكلة، بس الأهم إنك تلاقي بعد كل ده الطعم في الآخر لذيذ! وفي المقال ده هنحكيلكم عن أغرب أسماء الأكلات العربية ووصفاتها.
مفشش في حجر أمه
من أشهر الأكلات التقليدية في الجزائر، والمفشش في اللهجة الجزائرية معناها المدلل، وزيّ ما بينسبوا المهن للأكل، زي القاضي عملوا له أكلة اسمها لقمة القاضي، كمان لازم الأمهات يبقى لهم حظ.
الأكلة دي معروف إن الأمهات في الجزائر بيتفننوا في صنعها، وفي سبب تاني للتسمية هي مكوناتها اللي مش متناسقة وغرابة خلطها مع بعض، بس في الآخر طلعت أكلة شعبية لذيذة، وسبب تالت إن المكون الأساسي هو البيض المسلوق اللي بيتوسط كرة من اللحمة، زيّ طفل صغير يجلس في حِجر أمه.
طريقة التحضير
هنجيب نصف كيلوجرام لحم مفروم وحبة طماطم كبيرة مفرومة وبصلة صغيرة مفرومة و5 فصوص ثوم و4 بيضات مسلوقة ونص معلقة صغيرة من الكمون، والفلفل أسود، والفلفل الحار، والكسبرة، ورشة ملح، مع بسلة وبقدونس ومعلقة كبيرة زيت الزيتون وزيهم من معجون الطماطم.
ولتحضير المرقة، هنحط في القدر (الحلة) الطماطم والبصل المفروم و3 فصوص ثوم مفروم والملح والبهارات السابقة من غير الكزبرة، ومعلقة كبيرة من زيت الزيتون، ونسيبهم على النار لمدة 10 دقائق، ونضيف بعدها البسبة، و3 أكواب مياه.
ولتحضير الكفتة، هنجيب اللحمة المفرومة مع فصين ثوم والبهارات السابقة مع الكزبرة والبقدونس، وبعدها كرات من اللحم المفروم، وداخل كل واحدة نصف بيضة مسلوقة على شكل كرة، وتتقلي بزيت سخن لحد ما تتحمر، وبعد كده نشيلها من الزيت ونضيف فوقها المرقة ونسيبها في الفرن لمدة 10 دقائق وبالهنا والشفا.
ستي زبقي
من الأكلات السورية التقليدية، وبيقال إن بنت كانت بتجهز الأكلة وبتساعدها جدتها اللي كانت على خصام مع الجد، وفي وقت دخول الجد فجأة علشان يسأل عن الأكلة اللي شغالين على تجهيزها، قالت الحفيدة “ستي زبقي” بمعنى “جدتي اهربي” فالجد افتكر إن دي اسم الأكلة، ومن وقتها مسك فيها الاسم.
طريقة التحضير
هنجيب كوباية عدس أخضر مغسول بمياه باردة، و٦ كوبايات مياه و٣ بصلات متقطعة مكعبات متوسطة، وربع كوباية زيت زيتون، ونصف كيلو لحم ضاني مقطع مكعبات صغيرة، وربع معلقة كبيرة كمون مطحون، ورشة فلفل أسود و200 جرام مكرونة، ونص كوباية ثوم مفروم ناعم، كزبرة خضراء مفرومة ناعمة وعصير ليمون حامض.
هنحط العدس مع المياه في قدر كبيرة على النار، ونسيبه على نار هادية لحد ما يستوي، ونضيف زيت الزيتون في طاسة على النار وعليها البصل، ونحركه لحد ما يدبل ونزود عليهم قطع اللحم والكمون والملح والفلفل الأسود، ونضيفه لقدر العدس، وبعد ما يستووا نضيف المكرونة لهم، ونقلي الثوم بزيت الزيتون مع الكزبرة الخضراء، ونسيبهم لمدة دقيقة ونضيفهم على العدس، وآخر حاجة عصير الليمون، ونسيب المكونات لحد ما تستوي مع بعضها.
الشلولو
أكلة صعيدية بترجع لأيام المصريين القدماء، بتتميز بمذاقها “المزز” اللي فيه لسعة، سريعة التحضير ومش بتحتاج نار، متعودين ياكلوها مع العيش الشمسي اللي بيتحضر في الفرن البلدي، بيعتبروها من الأكلات المقوية للمناعة، وسبب التسمية بالـشلولو فسرته واحدة من سيدات الصعيد بإنه “بيتلولو” وأنت بتغمسه بالعيش.
طريقة التحضير
٥ ملاعق من الملوخية الناشفة، كوباية إلا ربع مياه بدرجة حرارة الغرفة، ٧ فصوص من الثوم، 5 حبات ليمون، بصلة صغيرة، حبة طماطم صغيرة، معلقة صغيرة من الملح و الفلفل الأسود، وممكن تزود شطة حسب الرغبة.
بنقطع البصلة والطماطم على شكل مكعبات، ونعصر الليمون ونهرس فصوص الثوم ونضيفهم مع معلقة صغيرة من الملح في طبق، ونقلبهم لحد ما يدوب الملح مع الثوم، نضيف الملوخية الناشفة للخليط ونقلبه مع المكونات، ونصب المياه ونقلب ونقدر نزود مقدار المياه على حسب لو حبينا قوام أخف للشلولو، وفي الآخر نضيف البصل والطماطم المتقطعة والفلفل الأسود ورشة من الملح مع التقليب، وبيتقدم مع نوع العيش اللي بتحبه، بس كده من غير ما تحط الملوخية على النار، وصفة بتاخد 15 دقيقة بالظبط.
الزفيطي
أكلة جزائرية مشطشطة ومناسبة لأوقات البرد، المصادر التاريخية ماذكرتش سبب التسمية الحقيقي، ولكن مع انتقالها بين الدول العربية أخدت أسماء تانية زيّ كسلاطة المهراس، أو الباطوط في ولاية المسيلة وفي الولايات المجاورة للمنطقة الأصلية لأكلة الزفيطي.
طريقة التحضير
هنجيب أربع حبات من الطماطم، وربع معلقة صغيرة من الكمون، وربع معلقة صغيرة من الملح، تلات فصوص من الثوم، حبة من الفلفل الأخضر الحار، وللعجينة كوبايتين من السميد الناعم، وربع معلقة صغيرة من الملح، وكوباية من المياه.
هنقطع الطماطم والفلفل الأخضر الحار لمكعبات صغيرة ونضيف الثوم المهروس مع التقليب، نتبل الخضار مع الملح والكمون ونقلبها ونسيبها على جنب، لتحضير العجينة، هنضيف السميد في وعاء عميق معاه الملح ونعجن بالمياه لحد ما يتماسك ونشكل العجينة على شكل دواير، وندخل الصينية في الفرن على درجة حرارة 200 مئوية لمدة ربع ساعة، وبعدها تترفع على الشواية وتتحمر من فوق وتتساب لحد ما تبرد وتتقطع لقطع صغيرة، وتتخلط مع مياه سخنة لحد ما يبقى طري وتتقدم مع اللبن بالزبادي وبالهنا والشفا.
الزعلوكة
“هتروح فين يا صعلوك بين الملوك” مثل شعبي بس أصله في الأول “هتروح فين يا زعلوك بين الملوك” ولكن اتحرف بمرور الزمن، ونقلًا عن واحدة من الروايات، إن قصته ارتبطت بحادثة تاريخية حصلت لشيخ من الشيوخ في عصر المماليك اسمه (إسماعيل زعلوك) كان بيشتغل موظف حسابات لواحد من الملوك ولسوء حظه كان معاه في وقت مذبحة القلعة واتقتل بالخطأ، ولما جم علشان يدونوا أسماء ضحايا الملوك، اتفاجؤوا إن اسمه بينهم، وطلع مثل “هتروح فين يا زعلوك بين الملوك” ده بالنسبة لقصة اسم الكلة، أما بالنسبة للأكلة نفسها، فهي مغربية واتنقلت للجزائر وتونس.
طريقة التحضير
هنجيب حبتين من البتنجان مشوي أو مسلوق ومقطع مكعبات، وحبتين من الطماطم مقشرة و مقطعة مكعبات، ونص كوباية بقدونس مفروم، معلقة كبيرة من الثوم المهروس، خمس معالق كبيرة من زيت الزيتون، فلفل أحمر حلو وفلفل أصفر وملح حسب الرغبة، نص ملعقة صغيرة من الكمون المطحون، فلفل أحمر حار مطحون (حسب الرغبة)، وفلفل أسود مطحون.
نجيب الثوم، وزيت الزيتون، والفلفل، والبقدونس، والطماطم في طاسة على نار متوسطة مع التقليب، لحد ما تبقى الصلصة كثيفة، ونضيف البتنجان المشوي بعد تقطيعه ونضيف الملح والفلفل الأسود والأحمر، ونقلب مع المكونات التانية ونسيبه على النار لحد ما المياه تجف تمامًا وتتكاثف المكونات، وبعد كده نضيف الزغلوك في طبق التقديم ونزينه بالبقدونس المفروم وبالهنا والشفا.
في النهاية، تسمية الأسماء الغريبة ممكن يكون راجع لمواقف وأحداث تاريخية أو قصة حصلت وقت الأكلة ربطوها بالأكلة أو مثل شعبي لايق عليها أو مكون أساسي في الأكلة كان هو البطل، فحبوا يكرموه والأكلة اتسمت على اسمه، أو كلمات دارجة نتجت عن تحريف للغة، بس أيًا كان قصة الاسم تفضل الأسماء الغريبة بتثير عندك الفضول لمعرفة القصة وبالتالي مافيش مانع لو جربت الأكلة.