في رتم الحياة السريع اللي بنجري فيه دلوقتي، بنحاول وسط اليوم نخطف وقت نهتم فيه ببشرتنا وشعرنا، اللي لو كانوا بيعبروا عن نفسهم كانوا عيّطوا من قلة اهتمامنا. بس واحنا بحاول نراضيهم ممكن نبقى بنعمل حاجات بسيطة في روتين البشرة والشعر بندمرهم بها واحنا مش واخدين بالنا وفاكرين إننا كده هنبقى كيكات، إيه الغلطات دي؟
للبشرة
معجون الأسنان على البشرة
الطريقة دي ممكن تبقى من أشهر التريندات اللي طلعت تحت مسمى “إزالة الرؤوس السوداء بسهولة وباستخدام مكوّن موجو في كل بيت” وناس كتير ننصحت بيه، وطريقته إنك بتحطي معجون الأسنان مباشرةً على البشرة على المنطقة اللي فيها رؤوس سوداء، وتسيبيه على بشرتك دقايق وبعدين تدلكي بفرشاة وبعدين تمسحيه.
الطريقة دي سببت جدل كبير وأطباء جلدية نصحوا بعدم استخدام معجون الأسنان على البشرة لإنه خطر، لإن معجون الأسنان بيحتوي على (كبريتات لوريل الصوديوم)، وده هيكون قاسي جدًا على البشرة وبيؤدى لالتهابها اعتمادًا على درجة حساسية بشرة كل شخص، وحتى لو كان نوع البشرة شديد الصلابة ومش حساسة على الإطلاق، فده مش هيحصنها من التأثر برد الفعل السيئ المترتب على استخدام معجون الأسنان.
ده غير إن معجون الأسنان بيحتوي على درجة حموضة قلوية، لكن بشرتنا حمضية بشكل طبيعي، وده معناه إنه لما نحط معجون الأسنان على البشرة هتتعرض لخطر التهيج والطفح الجلدى والتهاب الجلد، وده حسب تصريحات أطباء جلدية.
التقشير أكتر من اللازم
عارف لما تبقى مابتعرفش تمسك العصاية من النص؟ لو بتعملي كده مع تقشير بشرتك فأنتي بتدمريها، لإن التقشير أكتر أو أقل من اللازم يعتبر من أخطر الحاجات اللي ممكن نعملها، والتقشير المفرط والتخلص من الطبقة العليا للجلد مضر بالبشرة على المدى الطويل، المعدل الطبيعي للتقشير هو يومين أو تلاتة في الأسبوع بحد أقصى، وده اللي بينصح بيه أطباء وخبراء من ماركة متخصصة للعناية بالبشرة كمان.
لكن برضه إهمال التقشير مضر، لإنه بيسبب تراكم الخلايا الميتة على سطح الجلد وده بيخليها تبان جافة وباهتة، علشان كده لازم نمسك العصاية من النص.
مكياج في التمرين
دي تحس إنها بديهيات، بس لسه البنات بتعملها برضه ومش عارفين ليه. المكياج على البشرة أثناء التمرين له أضرار كتير، تعرق البشرة أثناء ممارسة التمارين الرياضية وجميع مسامات البشرة بتكون متغطية بالمكياج، وده بيخليها تتسلل داخل المسام وتتسبب في تراكم الرواسب، لإن البشرة بتحتاج تكون مش متغطية علشان المياه تقدر تخرج بحرية عند تعرق الجسم، وفي المقابل بتشكل البشرة طبقات رقيقة على سطح الجلد علشان تحميه من المخاطر، وفي حالة وجود المكياج، بيحصل انسداد للمسامات وبتصاب البشرة بعيوب كتير، علشان كده المفروض نهتم نغسل وشنا قبل التمرين.
النوم بالمكياج
ممكن ستات كتير بيبقوا عارفين إن النوم بالمكياج غلط، بس مش عارفين تحديدًا مدى خطورته وبيستهونوا بالموضوع ويفتكروا إن عادي يعني هيحصل إيه.
لكن فترة الليل جزء أساسي من عملية ترميم البشرة، والبشرة بيكون عندها الوقت لإصلاح الخلايا التالفة وتجديد الرطوبة، وبتنتج إفراز دهني طبيعي مليان بالعناصر الغذائية والأحماض الدهنية، لمساعدة الجلد على الالتئام. لكن لما تكوني نايمة وعلى بشرتك مكياج، المادة الدهنية اللي بتفرزها البشرة هتمتزج بالمكياج والأوساخ والشوائب، وده هيسد المسام ويسبب تشققات كبيرة وتجاعيد.
علشان كده مهم جدًا ننضف بشرتنا كويس من بقايا المكياج ومستحضرات التجميل، علشان نسيب بشرتنا تتعافى من نفسها ومانتدخلش في العملية الطبيعية دي ونفسدها.
للشعر
البلسم على الأطراف والشامبو على الفروة
في قاعدة بتحاول تنتشر دلوقتي بطرق مبسطة، تعالوا نحفظها كده:
البلسم لأطراف الشعر: الاستخدام الصحيح للبلسم علشان شعرك يستفيد منه وتحصلي على الترطيب المطلوب، هو إنك تحطي البلسم على الشعر نفسه مش على فروة الرأس، شعرك هياخد الترطيب اللازم من البلسم، لكن البلسم لما يتحط على فروة الرأس بيسبب أضرار كتير؛ أهمها إنه هيسد المسام ويتسبب في تساقط الشعر وانخفاض نموّه من المنبت.
الشامبو لفروة الرأس: وده الاستخدام الصحيح للشامبو، وبنحاول على قد ما نقدر مانحطش الشامبو بكمية على الشعر نفسه، الطريقة الأصح هي إننا نحط الشامبو على فروة الرأس لتنضيفها وبعد كده نوزعه على الشعر بشكل رأسي، لإن الهدف الأساسي من الشامبو هو التنضيف بس، لكن لو اتحط بكميات على الشعر نفسه هيتسبب في جفافه وهتلاحظي ده بشكل سريع، لإن الشامبو بيحتوي على السيليكون والسلفات ومواد تانية بتنشف الشعر، لكن هي عامل رئيسي للنضافة، فالأحسن تركزيه على فروة الرأس نفسها.
علشان نسهّل على نفسنا، في حركة صغيرة -هبلة- كده ممكن نفتكر بيها القاعدة دي: إزازة الشامبو بيبقى وشها فين؟ لفوق علشان تفتكر إن الشامبو لشعرك من فوق (للفروة) وإزازة البلسم وشها لتحت، علشان تفتكر إنها للأطراف تحت مش الفروة فوق.
دي تقريبًا أكتر غلطات منتشرة وبنشوف ناس بتنصح بها وبتنفذها، فحبينا ننشر كمان أضرارها علشان تبقى قدامك الصورة كاملة وماتضريش بشرتك، خصوصًا لو أنتي في العادي اهتمامك بها كل فترة، فلو مش هتفيديها ماتضريهاش وسيبيها على الأقل تقوم بالعمليات الطبيعية لها من غير ما تتدخلي وتبوظيها.