بسبب فيروس كورونا حاجات كتير بنحبها اتاجلت أو اتلغت، وبعد التأجيل أكتر من مرة أخيرًا سينما زاوية أعلنت عن بداية بانوراما الفيلم الأوروبي في دورتها الـ 13، واللي هتكون في الفترة من يوم 1 لـ 10 أبريل، بانوراما الفيلم الأوروبي برنامج بيعرض أفلام حصلت على جوائز في أوروبا، البرنامج بدأ في مصر من سنة 2004، بدعم من الاتحاد الأوروبي وبالتعاون مع EUNIC وتحت رعاية وزارة الثقافة، والسنة دي العروض هتكون في سينما زاوية بوسط البلد وسينما جالاكسي بالمنيل، تعالوا نعرف أكتر عن الدورة دي وأفلامها وإزاي تقدر تحجز للأفلام اللي نفسك تشوفها وكمان أسعار التذاكر.
الحجز للتذاكر متاح من شباك تذاكر سينما زاوية وسينما جالاكسي وكمان أونلاين علشان يبقى سهل عليك ماتفوتش الأفلام اللي مستنيها، أما أسعار التذاكر فهي بسعر مناسب وموحد، 50 جنيه، السنة دي بيشارك 40 فيلم في البانوراما بـ 3 أقسام، قسم أفلام روائية طويلة، وعددها السنة دي 13، وقسم أفلام تسجيلية بعدد 13 فيلم السنة دي، وقسم “مخرجون صاعدون” بيضم 14 فيلم. وده جدول العروض في السينما تقدر تختار المواعيد اللي تناسبك بين سينما زاوية وسينما جالاكسي.
كمان زاوية بتقدم كارنيهات البانوراما، ودي بطاقة بتتيح لحاملها حضور الحفلات الصباحية من الساعة 1 الضهر، و4 العصر مجانًا في سينما زاوية وسينما جالكسي، والاشتراك فيها أسعاره مختلفة، بطاقة الصحفيين بـ 100 جنيه، بطاقة الطلبة بـ 200 جنيه، بطاقة العاملين بمجال السينما بـ 250 جنيه، وتقدروا تملوا استمارة التقديم من هنا، أما الدفع والاستلام السنة دي هيتم في سينما زاوية، العروض طبعًا هتتم مع تطبيق كل الإجراءات الاحترازية لمواجهة فيروس كورونا.