5 مخرجين عرب شباب انتقلوا للعالمية بأفلامهم الناجحة

في الوطن العربي عندنا كتير من المخرجين والمخرجات اللي موهبتهم وطموحهم ملهوش حدود، وفي اللي قدر يستغل الشغف والطاقة دي في إنه يطلع تحف فنية من أفلام طويلة وقصيرة، واللي بيهم قدروا ينقلوا الموهبة العربية بصورتها الصحيحة للدول الأجنبية وكمان يأخدوا جوائز عالمية ودولية ويحققوا إنجازات للسينما المصرية والعربية.. تعالوا إحنا كمان نفتكرهم مع بعض ونديهم التقدير والحب اللي يستحقوه.

المخرج المصري عمرو سلامة

عمرو سلامة من أبرز وأنجح المخرجين الشباب في السينما المصرية اللي ليهم أعمال مهمة زيّ فيلم الشيخ جاكسون، وأسماء، ولامؤاخذة، والفيلم الأجنبي تحرير 2011، ومؤخرًا أول مسلسل نتفليكس مصري “ما وراء الطبيعة”، وشارك بأفلامه في مهرجانات عالمية زيّ مهرجان فينيسيا السينمائي (بفيلم تحرير 2011)، مهرجان قرطاج السينمائي الدولي (بفيلم الشيخ جاكسون)، مهرجان فريبورج السينمائي الدولي (بفيلم أسماء)، واترشحت كتير من أفلامه لجوائز عالمية في مهرجانات دولية وحصل على العديد من الجوائز دي.

المخرج المصري سامح علاء

سامح علاء كان أحد المخرجين المصريين اللي شارك بفيلمه القصير “ستاشر” في مهرجان الجونة السينمائي بدورته الرابعة، والفيلم نال الإعجاب مش بس في مصر ولكن على مستوى عالمي كمان، فحصل على جائزة “السعفة الذهبية” كأفضل فيلم روائي قصير بمهرجان كان السينمائي الدولي.

المخرج الفلسطيني أمين نايفة

المخرج الفلسطيني أمين نايفة، قدر يخرجلنا مجموعة من الأفلام القصيرة والروائية اللي بتجسدلنا قضايا مهمة في المجتمع بدون تزييف أو تجميل، وكم المصداقية اللي في أعماله زيّ فيلم “200 متر” والفيلم القصير”العبور” والفيلم الوثائقي “العيدية”، هي اللي خلتهم يوصلوا مش بس لقلوب العرب ولكن للأجانب كمان اللي اعترفوا بالموهبة العربية، وكمان اتكرموا بجوائز في مهرجانات سينمائية مهمة زيّ مهرجان قرطاج السينمائي الدولي، ومهرجان الفيلم العربي الفرنسي وغيرهم.

المخرج المصري محمد دياب

بعد شهرة محمد دياب العالمية من خلال فيلم “اشتباك” اللي شارك بمهرجان كان السينمائي في 2016، جاءت المفاجئة الكبيرة لاختياره لإخراج مسلسل أجنبي عن الأبطال الخارقيين “Moon Night” وده بيعتبر انتصار كبير واعتراف بقدرات المخرجيين العرب الكبيرة.

المخرجة التونسية كوثر بن هنية

المخرجة التونسية كوثر حققت نجاحات كبيرة من خلال أفلامها، وأخرهم كان فيلم “الرجل الذي باع ظهره” اللي مش بس كان من أحد الأفلام المشاركة في مهرجان الجونة، ولكنه شارك كمان في مهرجان فينيسيا السينمائي الدولي وفاز فعلًا، وكمان في مهرجان ستوكهولم السينمائي.

فخورين بالمخرجين والمخرجات العرب اللي قدروا يثبتوا وجود السينما العربية بجدارة على الساحة، ويلفتوا الأنظار بموهبتهم العظيمة.

آخر كلمة: ماتفوتوش قراءة: “أول مخرج مصري في عالم الأبطال الخارقين.. اختيار محمد دياب لمسلسل مارفل الجديد.

تعليقات
Loading...