بدأت حملات كتير واتجاهات لتبني كلاب الشارع أو الكلاب البلدي بدل ما نشتري كلاب أجنبية بأنواع مختلفة منتشرة للبيع زي الجيرمان شيبرد، أو الجولدن ريتريفر، أو اللابرادور وغيرهم، لمميزات كتير في الكلاب البلدي من ناحية، ومن ناحية تانية لتشجيع التبني نفسه بدلًا من الشراء، وده سبببه وجود كلاب كتير محتاجة للرعاية والإهتمام ممكن نديلهم الفرصة دي، بالرغم من إنهم يبدو عليهم الشراسة لكن ده فقط لإنهم في الشارع دايما بيتعرضوا لمضايقات فبيضطروا للدفاع عن نفسهم فتبدو عليهم الشراسة لكنهم في الحقيقة بيفتقدوا الرعاية والنضافة ولو اتقدمتلهم الفرصة دي بيكونوا من ألطف أنواع الكلاب.
الكلب البلدي من الحيوانات المقدسة من أيام الفراعنة، اللي كانوا بيهتموا بالكلاب حسب ما تم اكتشاف رسومات على جدران المعابد، وكانوا بيقتنوا الكلب البلدي اللي بيتسم بشراسته قدام الغرباء، علشان يساعدهم في حماية المعابد والمقابر من اللصوص، بالإضافة لإنه كان بيساعدهم في الصيد والرعي، ولإنه كان بيتصف بالشجاعة والذكاء والأمانة وشدة الوفاء لصاحبه، بالإضافة لقوة حاسة البصر والشم.
أسباب تخليك تتبني كلب بلدي
- الكلب البلدي لو لقى فرصة الرعاية والتحصين ضد الأمراض والتدريب، هيكون في قمة التعلم وسرعة الإستجابة للتدريب والذكاء.
- يصلح لأغراض الحراسة وكمان للتربية في البيت مع الأطفال، لكن لما نتكلم عن التدريب للحراسة منقصدش ما يعرف بـ “التشريس” لإنه خطر، لكن الكلب بطبيعته الوفية هيكون بيحميك من أي خطر ممكن يواجهك.
- بيتأقلم مع أي ظروف معيشية وده اللي بيخليه قادر يتعايش في الشارع ويعتمد على نفسه، فمش هيكون متعب ليك في تربيته سواء في التعامل معاه أو أكله أو حتي مكان تواجده.
- الكلب البلدي بيتمتع بمناعة ضد الأمراض أقوى من أي نوع تاني من الكلاب، وإنه من أوفي أنواع الكلاب لصاحبه.
- يعتبر الأقوي جينيًا وصحيًا، وده لتعوده على التعامل في الشارع اللي بيخليه يتكيف وده طبقًا لمبدأ البقاء للأصلح.
- الكلاب البلدي مش بتستجيب للعنف في تدريبها وتعزيز سلوكها.
- إنه مش بيمل من صاحبه أبدًا ودايمًا هتلاقيه بيتجاوب معاك في أي موقف مهما طالت مدته.
- بيحب وجوده وسط العيلة والأطفال وكمان وسط الحيوانات الأليفة وده بيشجعه على السلوك السليم وبيبعده عن السلوك العنيف، لكنك لازم تعوده على ده من صغره علشان ميقابلش صعوبة في التعامل معاهم وهو كبير.