عبر الفنان أحمد عيد عن دهشته بخصوص عدم إرسال دعوات له لحضور المهرجانات الفنية اللي بتقام في مصر، وقال الفنان في مداخلة مع برنامج (كلاكيت) على إذاعة (نجوم إف إم): “أنا عمومًا محدش بيبعتلي أي دعوة أحضر مهرجان في مصر للأسف، ليه ناس ونجوم كبار مش بيتم دعوتهم لحضور مهرجانات في بلدهم، أنا مش عارف السبب ومستغرب جدًا، ولكن أنا مش بشتكي بس بتساءل ليه”.
خلال اللقاء، اتكلم عيد عن الأخبار المتداولة عن تصريحاته الأخيرة أثناء حضوره حفل (joy awards) وإنه بيشتكي من الظلم وقلة الأعمال الفنية بسبب غيابه عن الساحة الفنية من فترة طويلة، فقال: “كلامي بيتحور أحیانًا علشان أبان بشتكي أو مظلوم ليه مش عارف”.
وكتب عن التصريحات على صفحته: “مساء الفل لقيت تصريح متاخد من سياقه من كلام كان بيتقال بهزار، أنا حابب أوضح إني ماقصدش أشتكي ولا أبان عندي مظلومية، أنا الحمد لله بيتعرض عليا شغل كتير، بس أنا مش عايز أشتغل غير اللى شايفه كويس احترامًا لنفسي وللجمهور، مش فارق معايا أشتغل أصلًا أو ماشتغلش”.
وأضاف: “المهم أعمل اللي أنا مقتنع بيه وماديًا مش محتاج ولا عندى مشكلة الحمد لله، بالنسبة للأخ اللي عمل تعليق على الصورة بيقول لي: “مالك يا أستاذ أحمد عينك فيها حزن ليه وسايب دقنك وشنبك” عايز أقول له إن بس ده “راكو” عشان بصور حاليًا، وبجد بشكركم كلكم على رسائل وبوستات الدعم”.
وعن آخر أعمال أحمد عيد، هيقدم مسلسل (عملة نادرة) خلال رمضان 2023، مع الفنانة نيللي كريم والمخرج ماندو العدل، ومن بطولة: جومانا مرد، وعلي الطيب، وهشام عاشور، ومحمد فهيم.