وزارة الثقافة أعلنت عن أكبر مهرجان فني وثقافي دولي على أرض مصر تحت عنوان She Arts، واللي بيضم مجموعة من الإبداعات الفنية المتنوعة لفنانات من كل أنحاء العالم، من خلال برنامج متنوع بيهدف إن الفنانات والمبدعات يتواصلوا مع الجمهور ويشاركوا إبداعاتهم .
الحدث ده هيجمع فنانات من مصر وسويسرا والبرتغال وفرنسا وفلسطين، وهيضم عدد من الفنون زيّ الموسيقى والعروض الراقصة والفنون البصرية والأنشطة الثقافية المرتبطة بكل بلد، ومن ضمن الفنانات اللي هيشاركوا في المهرجان: نسمة محجوب ومريم صالح ونوران أبو طالب وفرقة فابريكا واللي هيقدموا حفلات خاصة.
وهيبقى في عروض خاصة للرقص المعاصر وندوة عن تاريخ الرقص في مصر القديمة واللي هتقدمها الراقصة إيمي سالم، وهيبقى في لقاء مع الكاتبة مريم نعوم وهتتكلم عن “الست ورا الكاميرا”، الحفل هيبقى عبارة عن 12 فاعلية هيتقسموا على مدار تلات أيام، وهيبدأ الخميس 9 سبتمبر وهيكمل ليوم السبت 11 سبتمبر.
الحدث الفني ده هدفه الأساسي إنه يشجع كتير من الفنانات علشان الناس تشوف فنهم ويتبادلوا الخبرات وكمان يلهم بنات وستات كتير ويشجعهم إنهم لو عندهم موهبة مايتكسفوش إنهم يظهروها للناس أو يحسنوا من نفسهم علشان الموهبة دي تطلع للناس.
من زمان ولحد اللحظة اللي احنا فيها دي، والستات والبنات جزء لا يتجزأ من أي فن، لإنهم أثروا فيه وكان ليهم بصمة بشكل أو بأخر، فيعتبر الحدث ده احتفالية وتكريم للمرأة، وخصوصًا إن معظم الحاجات اللي بتطلع ليها مش بيبقى فيها الموارد والدعم الكافي للأسف، علشان كده الحدث ده كان فرصة علشان يخلق مساحة حرة مفتوحة للفنانات علشان يشاركوا قصصهم وفنهم.