“ButtonUp” وسيدات عزبة خيرالله بيساهموا في الحرب على الكورونا بصناعة العباءات الطبية

مع انتشار فيروس الكورونا وزيادة أعداد المصابين بيه زادت الحاجة للمستلزمات الطبية في كل المستشفيات المصرية، وده دفع بعض مؤسسات المجتمع المدني إنها تبادر بتصنيع أو التبرع بالمستلزمات الطبية اللي يقدروا عليها. كانت من ضمن المؤسسات دي “ButtonUp” الشركة الناشئة في عزبة خيرالله اللي بتساعد في تمكين شباب وسيدات المنطقة الشعبية اللي بتعتبر تاني أكبر منطقة عشوائية في القاهرة.

أغلب نشاطات “ButtonuUp” كانت قايمة على تصنيع المنتجات القماشية في ورشة الشركة، وبعد ما ابتدت الأزمة قرر القائمين عليها إنهم يطوعوا نشاطهم لخدمة الطواقم الطبية، واحنا لما اتكلمنا معاهم قالنا عبدالفتاح ندى أحد مؤسسي الشركة “احنا سألنا الهلال الأحمر والمستشفيات عن أكتر المستلزمات اللي محتاجينها فكانوا محتاجين العباءات الطبية أكتر حاجة، وده لأنها بتتلبس في كل المستشفيات سواء عزل أو عادية.”

بواسطة: ButtonUp

الطواقم الطبية بقت محتاجة تلبس العباءات دي طول الوقت في المستشفيات علشان تقلل فرص انتقال العدوى، خصوصاً إنه في حالات إصابة بالكورونا كتيرة مش بيكون عليها أي عرض من الأعراض وده بينشر المرض بمنتهى السهولة. وعلشان كده بدأت 20 سيدة من سيدات عزبة خيرالله من أول بداية شهر مايو في العمل على العباءات الطبية من خياطة وفرز وتغليف، وقدرت السيدات تنتج أكتر من ألفين عباءة خلال شهر واحد بس.

وبالنسبة لإجراءات الوقاية والأمان، فالعمل في الورشة اتقسم على شيفتات في مواعيد مختلفة بحيث ميتجمعش أكتر من سيدتين في غرفة واحدة أثناء تصنيع العباءات، وده طبعاً مع الالتزام بإجراءات الوقاية والتعقيم طول الوقت.

بواسطة: ButtonUp

كل العباءات تم تصنيعها وتوزيعها على المستشفيات الأكثر احتياجاً بالتعاون مع الهلال الأحمر المصري، ومستشفى القصر العيني، ونقابة الأطباء في الدقهلية. وبالنسبة لتكاليف التصنيع ف”ButtonUp” بتعتمد على التبرع المسبق بسعر العباءات علشان يقدروا يغطوا الاحتياج وينتجوا أكبر عدد ممكن منها في وقت قليل.

آخر كلمة: متفوتوش قراءة بالصور: بدو سيناء وفن الكمامات المطرزة

تعليقات
Loading...
Tweet
Share
Share
Pin