في الثقافة العربية والغربية، ارتبط رقم 13 بالشؤم والنحس زي ما بنقول، والحقيقة إننا كنا واحنا صغيرين فاكرين إن دي مجرد أسطورة تناقلتها أجيال أمهاتنا، زيها زي أساطير الشبشب المقلوب والمقص المفتوح والحاجات دي، لكن لما كبرنا اكتشفنا إن دي مش في ثقافتنا مجتمعنا المصري أو العربي فقط، دي كمان في الثقافة الغربية منتشرة بقوة أكبر، طب ليه ملايين في العالم يجمعوا على إن رقم بعينه يبقى سبب تشاؤم؟
في أساطير كتير ومختلفة في بلاد عن قصص بتخلي ناس تؤمن بإن رقم 13 أو حتى يوم التلات سبب تشاؤم، زي:
- روما: في أسطورة في روما كانت بتقول إن لما يتجمعوا الساحرات بيكون عددهم 12 ساحرة والشيطان هو رقم 13.
- العشاء الأخير: في قصة عن اللوحة الشهيرة (العشاء الأخير) بتقول إن الضيف رقم 13 هو كان الخائن على المائدة، ومن هنا كان التشاؤم من الرقم.
- حبل المشنقة: في أسطورة تانية بتقول إن حبل المشنقة بيكون مربوط بـ 13 عقدة.
- فنادق كتير بتشيل رقم 13 من قاموسها وبترقم الغرف من بعد 12 بـ 14 على طول، بسبب إن معظم النزلاء بيرفضوا يكونوا في غرفة 13.
- مستشفيات كتير متأثرة بالأسطورة دي، وبتشيل رقم 13 من الغرف، وفعلًا مافيهاش غرفة برقم 13 لأنه شؤم فما بالك في المستشفى.
40 مليون أمريكي بيتشاءموا من السكن في الدور الـ 13
الجملة دي كانت عنوان في موقع (إنفيرس) الأمريكي، اللي ذكر إن الولايات المتحدة فيها أكتر من 40 مليون شخص بيتجنبوا السكن في الدور الـ 13 لو نزلوا في أي فندق ولو لليلة واحدة، وده بسبب إنهم بيعتبروا إن الرقم ده نذير شؤم ومصدر للتعاسة.
الرقم ده كان بناء على مسح أجرته شركة (أوتيس إليفايتر) المتخصصة في المصاعد الكهربائية، اللي قالت: “مقابل كل مبنى في الولايات المتحدة يتضمن الطابق 13 فإنه يوجد ستة مبان بالمقابل لا يوجد فيها هذا الطابق، أي أنها تنتقل من الطابق 12 إلى 14 مباشرة، ما يعني أن الذين يتشاءمون من هذا الرقم هم ستة أضعاف الذين لا يكترثون به في المجتمع الأمريكي”.
مش بس 13..
الغريب إن التشاؤم من شيء مش مقتصر بس على رقم 13 أو يوم التلات، في الثقافات المختلفة في أرقام تانية بيتشاءموا منها.
زي الثقافة الصينية أو دول شرق آسيا، اللي بيعتبروا رقم 4 ده نذير شؤم، لأن نطق الرقم بيشابه النطق بكلمة “موت” في اللغة الصينية، ولفظ 14 مشابه لمعنى “ستموت حتمًا”، ولفظ 24 مشابه لمعنى “من السهل أن تموت”.
وفي روسيا، بيتشائموا من رقم 40، لأن الروس بيعتقدوا إن الأشخاص اللي بيموتوا بيتجولوا حول الأرض لمدة 40 يوم بعد وفاتهم.
في ثقافات مختلفة، التشاؤم من شيء بعينه سواء كان رقم أو يوم أو حتى كائن حي، بس كل دي أساطير متوارثة في أجيال مالهاش أي أساس علمي أو حتى وقائع متأكدين منها. بتصدقوا في الأساطير دي ولا لأ؟