النباتات المنزلية هي أي نبات نقدر نزرعه ونحافظ على حياته جوا البيت، سواء في أصيص نقدر ننقله من مكان لمكان، أو في حدائق مصغرة جوا البيت.
عمومًا، كل النباتات اللي ينفع تتربى جوا البيت، هي نباتات تنتمي إلى المناطق الدافئة زيّ المناطق الإستوائية والقريبة منها، وده لأن طبيعة الغابات الكثيفة في المناطق دي بتخلي النباتات تقدر تعيش مع أشعة شمس قليلة، ودرجة حرارة عالية.
أول حضارة نعرفها زرعت النباتات في أصيصات كانت أوائل الحضارة اليونانية والرومانية، واللي غالبًا استخدمت الأسلوب ده علشان تربي النباتات داخل البيوت.
الحضارات الأقدم زيّ المصرية القديمة والهندية والصينية كانت بتهتم جدًا بالزراعة لغرض الزينة، ولكن ماعندناش دليل إنهم دخلوا النباتات دي جوا البيوت. أما اليابانين ومن أقدم العصور فاستخدموا الأشجار القزمة زي البونساي، وغيرها من النباتات جوا البيوت كزينة.
الاهتمام العالمي وتطوير الزراعة المنزلية بدأ في القرن الـ16 بعد كتاب جنة عدن (Garden of Eden) اللي كتبه السير هيو بلات عن أسرار زراعة النباتات المنزلية لغرض الزينة.
حاجات لازم تعرفها قبل ما تجيب نباتات منزلية
النباتات عمومًا كائنات بسيطة جدًا واحتياجاتها أبسط، لأنها بتحتاج منك شوية مياه ومكان مناسب في البيت وهتعمل الباقي بنفسها.
كل اللي محتاج تعرفه عن النبات المنزلي هو اسمه ونوعه ومحتاج قد إيه مياه وكام ساعة شمس في اليوم وتأثير أشعة الشمس المباشرة عليه، ونوع السماد اللي محتاجه، سواء سماد حمضي أو قلوي.
وفي تطبيقات للهواتف الذكية تقدر من خلالها تصور النبات، والتطبيق هيتعرف على فصيلته ونوعه وكل المعلومات اللي محتاج تعرفها عن العناية به.
ولو مش عايز تستخدم تطبيق، تقدر تصور النبات من خلال عدسة جوجل وتبحث بالصورة، وهتلاقي مواقع كتير بتتكلم عن كل اللي محتاج تعرفه عن النبات.
وفي الطريقة التقليدية والأبسط، وهي إنك تسألك صاحب المشتل اللي بتشتري منه وهو هيقول لك كل الملعومات، ودي أفضل طريقة بالنسبة لي، لأن صاحب المشتل بيكون فاهم النبات في البيئة الموجود فيها في مدينتك واحتياجاته أكتر من أي تطبيق أو موقع.
النباتات المنزلية: فن العناية وفريضة الصبر
دلوقتي ممكن نقول إنك اخترت نبات معين أو مجموعة نباتات منزلية وعارف هتعتني بها ازاي، ومحتاج تختار لها مكان مناسب في البيت.
وعلشان تختار المكان المناسب للنباتات المنزلية في البيت، لازم تكون عارف احتياجها من الشمس بالظبط، بتنقسم النباتات المنزلية لأنواع على حسب حاجتها للشمس، في نباتات بتحتاج شمس مباشرة لعدد ساعات معينة في اليوم علشان تعيش.
في نباتات لو جت عليها أشعة الشمس المباشرة بتحرقها وبتموت، ودي اللي بنقول عليها نباتات الظل، أما النوع التالت مش بيقدر يعيش من غير شمس زيّ نباتات الظل، بس لو الشمس جت على ورقه بشكل مباشر بيتحرق وبيموت زيّ نباتات الظل بالظبط.
النوع الأخير ده مش متعب ولا حاجة، هو بس بيحتاج حجاب بينه وبين أشعة الشمس، زيّ ستارة خفيفة متخرمة، أو شبكة ضيقة، أو أي حاجة تعمل تشتيت لأشعة الشمس علشان ماتنزلش بكل قوتها على الورق.
بين الشمس والظل: فن اختيار المكان المناسب
لو النبات محتاج من أربع لخمس ساعات في الشمس، زيّ الريحان والنعناع ونخيل الساجو والصبار وشجرة الحليب الإفريقية، فده معناه إن أفضل مكان هو البلكونة، أو أقرب مكان للشباك أو البلكونة في البيت، علشان ياخد شمس براحته.
وأهم حاجة هنا إنك تتأكد إنك تسقيه كل ما التربة تنشف، وماتسقيهوش غير بالليل بعد غياب الشمس، لأن الشمس المباشرة بالذات في الصيف، بتسخن الميا جوا التربة وممكن تخلي الجذور تتعفن.
النباتات اللي بتحتاج تلات ساعات أول أقل في الشمس، أو اللي بتحتاج أشعة شمس مشتتة، زيّ شجرة التنين من جزيرة مدغشقر، يفضل إنك تحطها جنب شباك بتدخله شمس، علشان ماتتعرضش لشمس أكتر من حاجتها فتتحرق.
نباتات الظل زيّ البوتوس والمطاط والبيرش الإفريقي والهويا، محتاجة تتحط بعيد عن أشعة الشمس المباشرة، بس لازم يكون المكان اللي موجودة فيه منور بنور النهار القوي علشان تعرف تعمل بناء ضوئي.
ولو عايز تحط نباتات الظل في مناطق مافيهاش نور نهار طبيعي قوي، زيّ الحمامات أو المطابخ أو أي ركن ضلمة في البيت، ساعتها لازم تستخدم نور قوي فوق النبات، زيّ لمبة أو أباجورة قوية، وتقدر تطفيها بالليل، بس لازم تكون شغالة طول النهار.
بالنسبة لأوقات ري النباتات المنزلية، نفس قاعدة الري بعد غياب الشمس تنطبق على أي نبات عمومًا، سواء نبات بتزرعه جوا البيت أو بره، لأن حرارة النهار ممكن تسبب تعفن الجذور.