شوف إزاي فنان المايم ده بيوعيّ أطفال القاهرة بخطر الـ”كورونا”
أحمد ناصر، طالب بكلية الهندسة قَرر على عكس معظم اللي حواليه إنه يحاول يأثر في المجتمع بشكل إيجابي في وقت الأزمة اللي العالم بيمر بيها؛ يوم الخميس اللي فات نزل شوارع القاهرة القديمة لابس تي-شيرت مخطط وداهن وشه أبيض عشان يوعيّ بمخاطر فيروس كورونا المستجد.
أحمد نزل بالهيئة دي عشان هو مايم أو ممثل صامت، وبما إن معظم شغله إتوقف بسبب الإجرائات الاحترازية لمنع انتشار الفيروس، فهو قرر إنه يساهم بالوقت الفاضي ده في إنه يحاول يوعيّ الأطفال اللي معندهمش إنترنت أو طريقة تانية يوصلوا بيها لمعلومات عن الفيروس.
في حيّ القلعة بالقاهرة، إتفاجئ الأطفال والكبار بمايم في الشارع بيوزع على الصغيرين كمامات وبيكلمهم عن أهمية غسل الإيدين دايمًا عشان يحموا نفسهم واللي حواليهم من عواقب “كوفيد-19”.
أحمد لاحظ إن أطفال كتير بتقضي وقتها في الشارع مش في البيت بعد ما المدارس قفلت أبوابها، وكتير منهم ميعرفوش معلومات كفاية عن طريقة نقل الفيروس وإزاي يتجنبوه، بس أحمد بيحاول يعمل فرق بالمبادرة اللي بدأها. الممثل الصامت ده نزل بلبس شغله بس عشان يجذب انتباه الأطفال ليه، لكنه مكانش بيمثل، بالعكس هو كان بيتكلم بكل وضوح عشان يوصل لجمهوره المعلومة اللي عنده.
دي مش أول مرة أحمد يعمل كدا، الأسبوع اللي فات هو كان في منطقة باب الفتوح بيعمل نفس الموضوع عشان يحاول يوعي أكبر عدد من الأطفال ممكن.