أخر تحدي تيك توك بلمسة عربية.. شوف إزاي المؤثرين دول بيغيروا مفهوم العالم عن المنطقة
بالرغم من إن الإجرائات الاحترازية اللي منها التباعد الاجتماعي بتفرقنا عن بعض جسمانيًا، إلا إننا عالسوشيال ميديا دايمًا مع بعض، ومع إن ده مش كفاية، ولا عمره كفاية، كلنا بنحاول نلتزم بالتعليمات عشان نحمي نفسنا ومجتمعاتنا.
الأخبار السيئة في كل مكان حوالينا، مع تصريح منظمة الصحة العالمية إن “الأسوء جاي”، ومع عدد مصابين تخطى الـ 2 مليون، صعب إننا نلاقي حاجة إيجابية في يومنا، بس بالرغم من ده على السوشيال ميديا -وبالذات على تيك توك- ناس كتير بتحاول تخلق محتوى سواء دمه خفيف أو بينشر سعادة، زي التحديات الإيجابية الكتير اللي انتشرت الفترة اللي فاتت.
أخر تحدي من النوع ده هو تحدي “#DontRush” اللي فيه الناس بتصور فيديو ليها قبل وبعد ما يتشيكوا، التحدي ده بدأ مش من كتير، بس حاليًا هو من أكتر التحديات المنتشرة بين المؤثرين على تيك توك وإنستجرام. الإعلامية والمؤثرة الفلسطينية هيفاء بسيسو قررت هي ومجموعة من المؤثرين العرب يعيدوا خلق التحدي ده بس بلمسة عربية، وبدل ما يتصوروا بعد ما يجهزوا ويتشيكوا، المؤثرين دول قرروا يصوروا نفسهم بعد ما يلبسوا اللبس التقليدي لدولتهم العربية.
ناس كتير حوالين العالم فاكرة إن الهوية العربية هي قالب واحد في كل المنطقة، اللي أغلب الناس متعرفهوش إن كل دولة هي فريدة بعاداتها وتقاليدها وحضارتها وثقافتها، والفيديو دا بيبين قد إيه الهوية العربية متنوعة وغنية وفي نفس الوقت متداخلة.