على مدار اليومين اللي فاتوا، شهدت الساحة الغنائية شد وجذب كتير حوالين أغنية “نمبر وان” اللي مبطلش الجدل يحصل حواليها من ساعة ما نزلت للجمهور. فالتوتر بدأ لما الفنان أحمد فيشاوي أبدي رأي كان بينقُد فيه أغنية الفنان محمد رمضان “نمبر وان”، وزاد التوتر لما أعلن الفيشاوي عن قيامة بأغنية مضادة ليها باسم “نمبر 2″، الأمر اللي كان من المستحيل إن محمد رمضان يعديه من غير تعليق ودفاع عن أغنيته المفضلة.
كان قال الفيشاوي في لقاء تلفزيوني إنه بيحب وبيحترم محمد رمضان ولكنه بيسخر بس على “الأغنية” مش محمد رمضان نفسه. وكان وضح كمان إن فكرة “الأغاني المضادة” ده مش جديد في الوسط الغنائي وإن كتير من فنانين برا مصر بيعملوها بروح مرحة من غير ما يبقى في ضغائن وخلاف بينهم، لأن الساحة بطبيعة الأحوال بتفرض مبدأ “المنافسة”. ولكن من الواضح إن محمد رمضان مبيحبش النوع ده من الأغاني واللي بيعتبروا هجوم عليه وعلى فنه، فزي لما حصل كلام كتير لما بشرى نزلت أغنية “كوبرا” اللي كانت برضه بتتريق على أغنية “نمبر وان”، ورد عليها رمضان بـ”مافيا” وقتها، بيحصل دلوقتي نفس نوع الصدام مع الفيشاوي..
في حوار تلفزيوني كان وضح الفيشاوي قبل كده إن من الممكن لأي حد إنه يطلق على نفسه إنه رقم واحد في وقت معين يكون حالته الفنية مزدهرة فيه، ولكن ده لا يعني بالضرورة إن الشخص ده هيفضل رقم واحد إلي الأبد. وقال كمان إن عَمَل أغنية فُكاهية بترد على إحدى أغاني رمضان لا تسيء ليه في أي شيء. وعلى الرغم إن كان من المفترض إن الموضوع يكون مجرد هزار لأن الفيشاوي قال إنه من متابعين أغاني رمضان وبيحبها، إلا إن الموضوع أخد منعطف تاني تمامًا. فلما جيه الوقت على رمضان إنه يرد ويعلق، قال على أغنية الفيشاوي إن “محدش يقدر يتريق علي أغنية نمبر وان” لأن حلم أي حد هو إنه يوصل للمكانة دي، ولما إتسأل ترد بإيه على أحمد الفيشاوي، قال في رد ساخر “يا رب الأغنية تنجح وتبقي رقم 2”.
لم يكتفي رمضان بالتعليق ده اللي بان فيه إنه مش واخد الموضوع بطريقة إيجابية، ولكنه كمان قرر إنه ينزل برد أقوى علي شكل أغنية بعنوان “الدبابة” حتى من قبل ما الفيشاوي ينزل بالأغنية. فنزل رمضان إمبارح مقتطف وإعلان تشويقي قصير عن أغنيته الجديدة واللي كان من ضمن كلامها “مع اعتذاري للفيشاوي أخروا معايا صورة”.
وده كان بعد ما أعلن الفيشاوي الأسبوع اللي فات، إنه بالفعل في الستوديو وبدأ يسجل لأغنية “راب” جديدة، فمتأخرش رمضان في إنه ينزل بالرد المباشر. وبان في نبرة صوت الفيشاوي الغضب والاستياء وهو بيعلق على مقطع الفيديو اللي نزل لأغنية رمضان الجديدة وقال بنبرة فيها حدة “أنا مش هقبل أعتذارك”.
هل هتشهد الفترة اللي جاية تطور في الصراع اللي داير ما بين الفنانين؟ ولا هيحصل صلح وهيتقبلوا هما الاتنين أغاني بعض بصدر رحب وروح رياضية؟ لأن في الأول وفي الأخر إحنا بنتكلم عن شخصين ليهم قيمتهم الكبيرة في الوسط الفني، وبالتأكيد الساحة الغنائية تساع أغاني الاتنين.