وزارة البيئة تطلق أول حملة ترويجية بالتعاون مع وزارة الإعلام ووزارة السياحة والآثار لزيارة المحميات الطبيعية ودعم السياحة البيئية في مصر، وكمان لرفع الوعي البيئي لكل المصريين وتعريفهم بالأماكن السياحية والمحميات الطبيعية الفريدة اللي بتتميز بيها مصر.
الحملة هتنطلق بشكل رسمي يوم 25 سبتمبر، والانطلاق هيكون في وسط محمية راس محمد اللي موجودة في شرم الشيخ، الحملة هتستمر لمدة سنتين، وهدفها تشجيع المواطنين على زيارة المحميات الطبيعية اللي مليانة بالحيوانات والطيور والنباتات النادرة، والأماكن الفريدة اللي بتضمها المحميات، وكمان للتعرف على الثقافات المختلفة للسكان في كل منطقة فيها محميات، السكان اللي بيعتبروا حماة للتراث البيئي للمناطق دي.
مش بس كده، الحملة كمان بتروج للسياحة الداخلية والخارجية،لأنها هتسلط الضوء على الأماكن السياحية والمناطق الطبيعية المميزة والفريدة من نوعها في مصر وهتشجع السياح المهتمين بزيارة الأماكن دي والتعرف على ثقافات مختلفة، وده هيدعم الناحية الاقتصادية ويوفر فرص عمل أكتر في الأماكن السياحية دي.
وعلشان كده، وزيرة البيئة، الدكتورة ياسمين فؤاد، أشادت بالجهد المبذول في تطوير البنية الأساسية للمحميات الطبيعية اللي بتعتبر من كنوز مصر، وتم بالفعل تطوير حوالي 13 محمية من أصل 30 محمية طبيعية في مصر، التطوير شمل توفير مراكز استقبال للزوار في محمية راس محمد، وتحسين الخدمات المقدمة، وكمان ورش عمل للأهالي لتدريبهم على أنشطة الإنتاج الثقافي والحرف اليدوية المرتبطة بالمحميات، وده أدى لزيادة دخل سكان مناطق المحميات.
