بيمسك بإيده اليمين عصايته السحرية، والإيد التانية بيحركها بخفة وحرية، والاتنين يقدر يعبر بهم المايسترو عن محتوى النوتة الموسيقية؛ امتى يقول للفرقة تبدأ وامتى توقف، امتى تعلى النغمة وتهز قلوبنا، وامتى تهدى ونهدى معاها. المايسترو هو مخرج العمل الموسيقى، بس مش زيّ مخرجين السينما اللي بيتعاملوا مع النص بناءً على رؤيتهم، لأ هو مسؤول عن إخراج المكتوب في النوتة الموسيقة بالشكل المناسب اللي يخلينا نسمعها بشكل منسجم ونقول في الآخر “إيه الجمال ده”.. المقدمة دي بمناسبة الإنجاز الضخم والمميز اللي هيحصل لأول مرة في مجال الأوبرا، وبقيادة المايسترو المصري “نادر عباسي”.
لاول مرة مايسترو مصري يقود ١٣ عرض اوبرالي في امريكا
يتعاقد الرئيس والمدير الفني لمهرجان (جليمرجلاس) الشهير بنيويورك…
Posted by Nader Abbassi on Tuesday, October 11, 2022
لأول مرة مايسترو مصري هيقود 13 عرض أوبرالي في أمريكا، “لابوهيم” العرض الأوبرالي الأشهر، واللي يُعتبر واحد من أشهر الأوبرات العالمية للمؤلف الإيطالي “بوتشيني”.
هيبدأ الموسيقار المصري نادر عباسي البروفات في شهر يونيو 2023، استعدادًا للعروض اللي هتبدأ في شهر يوليو وأغسطس من السنة نفسها.
والمايسترو اتعاقد مع الرئيس والمدير الفني لمهرجان جليمرجلاس الشهير بنيويورك “روبرت اينسلاي”، ونادر عباسي قال على صفحته على الفيس بوك إنه اتبعت له برقية من إدارة المهرجان والمدير الفني بالشكر، لإنه وافق على التعاقد مع إدارة المهرجان.
إيه اللي ماتعرفهوش عن المايسترو نادر عباسي؟
قائد أوركسترا وكورال الاتحاد الفيلهارموني وفنان أوبرالي، أخد مجموعة من الشهادات في الموسيقى والغناء وقيادة الأوركسترا من أفضل المعاهد الموسيقية في العالم، أتقن العزف على آلة “الفاجوط” وبقى أفضل عازف في مصر، كان له بصمة خاصة من خلال مشاركته في أوركسترا القاهرة وأوركسترا السلام، ده غير مشاركاته العالمية الكتيرة؛ ومنها مشاركته في الفترة الممتدة من 1992 لـ 2001 كمغني أوبرالي في أوبرا جنيف، ومشاركاته أوبرا “عايدة” وأوركسترا “مارسيليا الفيلهارموني” في 2006.
ومانقدرش ننسى آخر مشاركاته المميزة، اللي كانت من خلال ظهوره كقائد للأوركسترا في حدث ضخم زيّ موكب نقل المومياوات الملكية في مصر، اللي كان فيها بطل من أبطال الحفلة، وأبهر العالم كله بأسلوبه الخاص وأدائه في قيادة الفرقة، مع ترانيم وأغاني بالهيلوغروفية.
وعن آخر أخباره، بيستعد المايسترو من خلال التعاون مع السوبرانو “فاطمة سعيد” لإحياء حفل جماهيري ضخم يوم السبت 29 أكتوبر في قصر عابدين، وده في إطار ضمان استمرارية تقديم نوع من الفن العالمي الراقي للجمهور المصري.