أسبوع الموضة في باريس من أهم الأحداث في الموضة عالميًا، والنجوم بيستنوا عروض الأزياء لأكبر وأهم مصممين الأزياء في العالم كله، وموضة الموسم بتبتدي من هناك. الحدث ده متربع على عرش مجال الأزياء بقاله سنين، وبنشوف فيه موضات مختلفة من العالم كله، لكن السنة دي حبينا نتكلم عن إطلالات النجمات العرب في أسبوع الموضة في باريس، اللي منهم كان يخطف العين، ومنهم كمان اللي كان غريب شوية.
كارن وازن
أحلى وأشيك إطلالات كانت من نصيب كارن وازن في أسبوع باريس للموضة، وبين فساتين بتصميمات مختلفة، وكمان لبس كاجوال وجينز، كارن كانت في قمة الأناقة والجمال، وكانت من النجمات اللي خطفوا أنظارنا في أسبوع الموضة في باريس. ده غير كمان إنها عملت فيديو قصير بتورينا فيه كواليس الشياكة دي كلها وسمته “fashion weak” وازاي كان في شيء من الضحك والمعاناة ورا الأناقة دي.
سلمى أبو ضيف
بتصميمات من “Valentino”، الفنانة المصرية “سلمى أبو ضيف” تألقت في أسبوع الموضة في باريس، وكانت من الناس اللي عجبنا لبسها، ده غير ظهورها بفستان من تصميم “إيلي صعب” واللي كان بيخطف الأنظار، وكان بستايل مختلف على سلمى. وبشكل عام بندي سلمى تقييم 10/10 في أسبوع باريس للموضة.
ياسمين صبري
في العادي، ياسمين بتتألق معظم الأوقات بإطلالات أنيقة في صورها على إنستجرام، ومتعودين منها على لبس بتنسيق شيك وعلى الموضة. وهنا، مافشلتش في إبهارنا بإطلالتها في أسبوع الموضة في باريس، وأكتر إطلالتين كانت متألقة فيهم كانت بجاكيت أبيض وأسود، والإطلالة التانية كانت رسمية بتوقيع “balmain” والإطلالة كان لها جلسة تصوير لمجلة “vogue” وفي الاتنين ياسمين كانت في قمة الجمال.
مايا دياب
متعودين من الفنانة مايا على إطلالات غريبة، وأزياء وألوان أغرب، حتى في أسبوع الموضة اعتمدت على نفس الأسلوب. وأكتر إطلالة كانت الأكتر منتشرة كانت غريبة شوية، وفكرتنا بالزينة الورق اللي كنا بنلعب بيها واحنا صغيرين، هي عملت منها فيونكة بقت فستان. لكن مايا صلحت الموضوع شوية بإطلالة تانية باللون الأسود كانت شيك، لكننا حسينا إننا شوفنا زيها كتير قبل كده على “كيم كاردشيان”.
إليسا
في عرض “إيلي صعب” لموضة خريف 2023، ظهرت المطربة إليسا بفستان ذهبي شيك، لكنه أقل ما يقال عنه إنه “عادي” مش مثير للجدل والغرابة، ولا فيه حركات وتريكات وموضة جديدة. لكن برضه كتر خيرها، احنا متعودين من إليسا على الشياكة من زمان، علشان كده فكرة دايرة الأمان اللي التزمت بها هنا ماتضرش.
داليدا خليل
الممثلة والمغنية اللبنانية داليدا خليل كانت ملكة الأزرق في أسبوع الموضة، بطقم كامل باللون الأزرق، وكان عبارة عن جامبسوت من تصميم “Naja Saade” وقبعة كمان زودت من شياكتها، وظهرت كمان بفستان تاني باللون البنفسجي كانت فيه شبه أميرات ديزني.