أول يوم في شهر أغسطس، اللي بينافس شهر مايو وداخلين تصفيات “مين أطول شهر في السنة”، بس أغسطس يكسب في الغلاسة علشان الحر والرطوبة، مش عايزين نتشائم من أوله علشان يعدي ضيف خفيف كده لا يأذينا ولا نأذيه، ونوصل بسلام لسبتمبر اللي بنعامله معاملة المُنقذ.. هنحاول نلاقي حلول تهوّن علينا الشهر ده ونتجنب سلبياته على قد ما نقدر:
اقطع مع صاحبك اللي بيحب الخروج كتير
احنا عارفين أهمية الشخص ده في الشلة ومقدررين مجهوده، بس في أغسطس والحر مش هنقدر نستحمل التنطيط الكتير في الشوارع الزحمة. لو قعدوا يزنوا علشان تخرجوا كل شوية، اقطع مع صحابك دول وارجع صالحهم في سبتمبر، علشان لا سننا ولا لياقتنا تسمح بكده.
اخرج في أماكن مكيفة
أكيد مش هنحبس نفسنا في البيت طول الشهر، ولازم كل فين وفين نخرج ولو مرة علشان نفسيتنا، بس احسبها كويس، وأنت خارج قرر هتروح فين، وخلّي بالك وأنت بتختار المكان، اختار مكان مكيف. ماتعملش زيّنا وتختار مطعم مافيهوش تكييف، وقعدنا في وش الفرن حرفيًا، علشان مبدأ إن الأكل يتعمل قدامك وتجربة مختلفة والحركات دي، معلش أجّل الأكشن ده للشتاء، ودلوقتي اخرج في أماكن مكيفة.
كُل آيس كريم
الموضوع يبان هايف؟ بس دي نصيحة من مجرب. لو اليوم طويل ودمه تقيل، جرّب تاخد استراحة محارب كده وروح كُل آيس كريم، هتحس إن الحياة قبله غير الحياة بعده خالص، ولنتائج أحسن، بننصحك لو أنت في الساحل ممكن تجرب Moko علشان بيعملوا نكهات عمرها ما تيجي في بالك، وفي القاهرة ممكن تجرب Stavolta، ولو الميزانية بعافية، روح على قويدر، ولو الميزانية ماتت خالص، هات أيس كريم من الكشك حتى. وممكن لو أنت في الإسكندرية وبتفكر في حاجة صديقة للميزانية، جرّب جيلاتي عزة.
اعمل ميزانية للشهر
زيّ ما أنت شايف كده في الشهور الطويلة بنبقى مستنيين القبض بفارغ الصبر علشان صرفنا من غير حساب وترتيب، مفروض نتعلم من غلطاتنا. وبما إننا لسه بنفتتح الشهر ولسه قابضين، اعمل ميزانية بمصاريفك وحاول تلتزم بيها علشان ماتقعدش تعيط في نص الشهر وتتمنى إنه يخلص، علشان هتستنى كتير وأغسطس هيخذلك.
سافر
لو شغلك مش بيعتمد بشكل كبير على وجودك في المكتب، حاول تسافر بأي ميزانية لأي مكان تغير فيه جو وتعدي من الشهر ده وتفلت منه، ده في حالة إنك ماعرفتش تاخد إجازة خالص، اشتغل على البحر، لإن مؤخرًا كورونا علمتنا إن مش كل الشغل لازم يتعمل في الشركات والمكاتب وممكن ننجز نفس كمية الشغل من البيت.. طب والبيت ليه، من على البحر أروق. نحاول نرجّع الزمن الجميل اللي الناس كانت بتقضي فيه الشهر كله في المصيف.
قضي يوم في المياه
لو الدنيا مش سامحة تسافر أو تصيّف، حاول تقضي يوم في حمام سباحة، أو تسافر صد رد العين السخنة مثلًا تقضي يوم في المياه وتبلبط وتنسى الحر فرهدة الشغل وشوارع القاهرة، بس احسبها صح ماتروحش تعمل سفرية صد رد للسلوم مثلًا، خليك في العين السخنة أو حتى الإسكندرية، علشان الخطة ماتوسعش منك.