أكيد صادفك ولو صورة من امبارح من فرح المغني أحمد بهاء، عضو فرقة شارموفرز، والفرح بسيط ولذيذ على الشط والعرسان قالعين الجزم وغارزين رجليهم في الرمل وهما بيرقصوا ويحتفلوا، والمعازيم كمان شاركوا الأجواء دي بفساتين للبحر ورقص على الشط. دي مش أول مرة نشوف الأجواء اللذيذة دي في أفراح، لعرسان بيقرروا يعملوا حاجة مختلفة ومناسبة للصيف غير الأفراح في قاعات، ودول 5 من أجمد الأفراح الروشة اللي شوفناها في الفترة اللي فاتت.
أحمد بهاء
الفيديوهات بتبيّن قد إيه الموضوع لذيذ وبيخرج برا الفكرة النمطية للأفراح وفقراته المعروفة من أول الشرابات عكس عكاس لحد قفلة أغنية يا سهر الليالي.. الفرح على البحر حرفيًا على الشط والرمل، والعرسان والمعازيم كلهم بيرقصوا بمنتهى العفوية، زيّ بالظبط روح أغاني شارموفرز اللي حققها أحمد بهاء وخديجة العرقان في فرحهم.
محمد فراج وبسنت شوقي
زيّ ما الناس كانت بتقول، ما شاء الله يعني، بسنت وفراج أكتر ناس عملوا أفراح، واحد منهم كان على البحر وبأجواء عشوائية خفيفة بعيدة عن النمطية والحاجات التقليدية كمان، حتى ألوان البدلة والفستان وتصميمهم كان بشكل هادي وبسيط مناسب للفرح على البحر والشمس في بداية موسم الصيف.
هاني عادل
زيّ ما شايفين في الصور، الأجواء مش محتاجة تتشرح في كلمات، علشان وأنت بتتفرج على الصور هتحس بالهواء بيخبط فيك كده ويطيّر شعرك، وهتشم ريحة البحر وهتحس بملمس الرمل وأنت بتتمشى على البحر، فتخيل لما يبقى فرحك اللي بيتقال عليه “ليلة العمر” تكون في الأجواء المريحة دي، خصوصًا لو أنت بتفضل الأجواء دي عن الجو الصاخب بتاع الأفراح التقليدية، زيّ هاني عادل ودايموند بو عبود.
عمرو سلامة ومروة البرماوي
في الجونة، وكل الأجواء اللذيذة للبحر والجو الحلو اللي استغلوها علشان يوثقوا يومهم بحاجات ماتتنسيش، ورغم إن الفرح عدى عليه أكتر من سنة، لسه لما بنشوف الصور بنحس بالفرحة والأجواء المختلفة اللي هما اختاروها.
نيللي كريم وهشام عاشور
في هاسيندا الساحل الشمالي، احتفلت نيللي كريم بزواجها من هشام عاشور لاعب الإسكواش، على البحر وبأجواء الصيف كمان، ووقتها الفرح كان تريند والناس حبت الأجواء دي ونشرت الصور على السوشيال ميديا، رغم إن الناس توقعت إن الفرح هيكون في الجونة لإنها هي اللي شهدت قصة حبهم، لكن عملوا الفرح في الساحل.
أحمد ماجد المصري
مصراوي
المخرج أحمد ماجد المصري، عمل فرحه كمان في نفس الأجواء اللي تليق بالصيف والبحر. وهو زيّ ما توقعت من اسمه أول ما قريته فعلًا، هو ابن الفنان ماجد المصري، وأخرج عدد من الأفلام الوثائقية، وانتشرت صور فرحه علشان كان مميز وبجو مختلف للبحر والشمس والأفراح الجديدة.