وزارة السياحة والآثار كشفت النهارده عن موقع أثري جديد في منطقة سقارة في الجيزة، وده يعتبر الكشف التاني في المنطقة السنة دي.
الكشف ده نتيجة لأعمال الحفر اللي بدأتها البعثة الأثرية المصرية، اللي شغالة في منطقة جبانة القطط، واللي كانت في مصر القديمة اسمها “البوباستين”، والمنطقة دي بدأت تكشف عن كنوز أثرية من سنة 2015 من مومياوات وتماثيل نادرة وجعارين محنطة.
الكشف الجديد هو عبارة عن حيوانات محنطة؛ أشبال أسود وخمس حيوانات نمس وقرود البابون، كمان ولأول مرة تم اكتشاف ٣ مومياوات لنسانيس كلها في حالة كويسة وجوا صناديق خشبية مقفولة كويس. الحيوانات دي كانت مدفونة جنب تماثيل خشب للإله سوكر بتاح، وصناديق تانية فيها تماثيل لأشخاص مسكوا مناصب في الدولة القديمة ،وصناديق تانية فيها تماثيل لحورس، وكل الاكتشافات دي في حالة كويسة ومحتفظة بألوانها، والكشف ده بيرجع ل2500 عام قبل الميلاد.
المؤتمر الصحفي اللي هيعمله الأمين العام للمجلس الأعلى للآثار بمنطقة سقارة الأثرية، كشف عن مصير الآثار دي وهتتعرض فين، التماثيل مثلًا هيتم نقلها للمتاحف المصرية بعد الترميمات الأولية بالمنطقة الأثرية، وكمان هتتعمل فتارين مخصوصة لعرض القطع الأثرية دي لوسائل الإعلام.
سقارة بتكشف عن أسرارها
في ١٩ مارس اللي فات وبعد أعمال حفر للبعثة الأثرية المصرية في منطقة شمال غرب هرم “مرنرع” في سقارة، أعلنت الآثار عن الكشف عن ٥ مقابر منقوشة من عصر الدولة القديمة وعصر الانتقال الأول. المقبرة لشخص اسمه “إيري” من كبار رجال الدولة، وفيها بئر بيودي لغرفة دفن، وجدرانها منقوشة بصور لمناظر جنائزية وموائد قرابين، وفيها تابوت كبير من الحجر الجيري.
جبانة سقارة هي تقريبًا أهم المناطق الأثرية في مصر، وفيها مقابر جدرانها منقوشة بروسومات جميلة جدًا، وفيها أهرامات ومعابد ومدافن السيرابيوم. ومن ٢٠١٠، والبعثات الآثرية هناك بتكتشف كنوز من مصر القديمة كلها اكتشافات عظيمة.
في ٢٠١٠، بعثة المجلس الأعلى للآثار اكتشفت مقبرتين أثريتين في سقارة من عصر الأسرة السادسة والعشرين، يعني من حوالي ٢٥٠٠ سنة، وهي من أكبر وأضخم المقابر الأثرية في منطقة سقارة.
في ٢٠١٧، البعثة الفرنسية السويسرية من جامعة “جنيفا”، اكتشفت هرم صغير مصنوع من الجرانيت الوردي، وفي ٢٠١٨، البعثة الأثرية المصرية الألمانية التابعة لجامعة “توبينغن”، اكتشفت ورشة كاملة للتحنيط وحجرات للدفن فيها مومياوات، والبعثة دي اكتشفت كمان قناع مومياء من الدهب فيه أحجار نص كريمة.
في ٢٠١٨، البعثة الأثرية لجامعة القاهرة، اكتشفت مقبرة كبيرة لواحد من قادة الجيش المصري القديم في عهد الملك رمسيس التاني، واسمه “إيورخي”.
وكمان في ٢٠١٨، أعلنت وزارة الآثار عن اكتشاف مقبرة فرعونية لكاهنة اسمها “حتبت”، وفي ٢٠٢٠ تم الإعلان عن كشف فيه 59 تابوت خشب ملون في منطقة آثار سقارة في مؤتمر صحفي عالمي بحضور أكتر من 50 سفير.
في نوفمبر ٢٠٢١ وفي كشف كبير، أعلنت وزارة الآثار عن اكتشاف ١٠٠ تابوت خشب ملون، و40 تمثال خشبي للإله بتاح سوكر، وعدد من تماثيل الأوشبتي والتمائم، و ٤ أقنعة من الكارتوناچ المذهب، في مؤتمر صحفي عالمي حضره أكتر من 300 صحفي وإعلامي مصري وأجنبي.