بسبب الضغط الاجتماعي والنفسي اللي بتسببه معايير الجمال الحديثة على الرجالة والستات، أصبح الجمال سلعة بيتم بيعها في عيادات ومراكز التجميل المنتشرة في كل مكان في العالم، ولكن صناعة التجميل حرفة طبية عالية التخصص بتحتاج لأطباء مؤهلين علشان يمارسوا أي نوع من أنواع التجميل.
وحتى عمليات التجميل البسيطة زي حقن البوتوكس والفيلرز أو استخدام الليزر لإزالة الشعر بيحتاج لطبيب جلدية أو جراح تجميل مؤهل طبقًا للقانون المصري، ولكن كشفت البي بي سي في تقرير ميداني عن عشرات الأفراد من غير الأطباء بيقوموا بالعمليات دي في انتهاك خطير للقوانين واللوائح في مصر.
وكشف التحقيق عن مخالفات مرعبة لقواعد السلامة في صناعة التجميل، واللي بيكون لها تداعيات صحية خطيرة على المرضى وبتسبب ندوب وعلامات تشوه في الوش والبشرة، واللي ممكن تستمر طول حياة المريض، وكشف التقرير كمان عن حالات موت حصلت بسبب الوضع الخطير لصناعة التجميل غير المرخصة في مصر.
في البداية حاول التقرير ايضاح مدى سهولة انشاء عيادة تجميل من غير أطباء مؤهلين، فبدأت المحققات المتخفيات بالاتصال بشخص اسمه أشرف جاد علشان يساعدهم في فتح العيادة، وفي المقابلة اللي صوروها بدون علم جاد قالوا له إنهم ماعندهمش أي خبرة طبية ولا خبرة في الحقن، فاخد الموضوع ببساطة وقال لهم إنه هيعلمهم في المركز الخاص به، مع العلم إن تدريب أطباء غير مؤهلين على ممارسة عمليات التجميل ضد القانون المصري.
عرف جاد المحققات المتخفيات على شخض تاني اسمه محمد المدني وهو طبيب تجميل، وعلى مدار تلات أيام قام جاد والمدني بتدريب المحققات على حقن الفيلرز والبوتوكس واستخدام الليزر لإزالة الشعر واداهم في نهاية التدريب شهادة مالهاش أي قيمة قانونية علشان يستخدموها في تضليل المرضى اللي هيتعاملوا معاهم.
وأكد جاد على المحققات إنهم يبدأوا الحقن في مركز عناية بالبشرة “في مكان متداري” على حد قوله. وعلى مدار الفيديو اللي نشرته البي بي سي تقدر تشوف قدر المخالفات المهنية والأخلاقية اللي بتحصل في العالم ده، ففي واحدة من المشاهد أثناء تدريب المحققات على الحقن قام الطبيب بحقن وريد المريضة اللي بيدربهم عليها وشوفنا الدم بينزل من الجرح ولكن الطبيب علق إن حقن الوريد مافهوش أي مشكلة، ولكن الطبيب اللي اتكلمت معاه البي بي سي في التقرير علق على ده وقال إن اصابة وريد في أثناء حقن البوتوكس أو الفيلر ممكن يسبب تنخر الجلد أو Skin Necrosis أو ردود فعل حساسية عالية، أو الأسوء إنه ممكن يسبب جلطات في أماكن مختلفة من الجسم واللي ممكن تؤدي للموت.
بعد حصول المحققات على الشهادات الموقعة من مركز أشرف جاد للتجميل عرفهم على محامي واللي ادعى إنه بيشتغل محقق في إدارة العلاج الحر، وهي المؤسسة التابعة لوزارة الصحة واللي بتراقب نشاط العيادات الخارجية.
طمن أبو العزم المحققات وقال لهم إنه هيساعدهم في ترخيص عيادة تجميل لهم باسم الدكتور محمد المدني، وإنه هيبلغهم في حالة وجود تفتيشات مفاجئة من إدارة العلاج الحر، وإنه في مقابل 4000 جنية شهريًا يقدر يساعدهم قانونيًا لو حصلت لهم أي مشكلة مع العيادة أو التراخيص.
ضحايا عيادات التجميل غير المرخصة
ناقش التقرير حالات ضحايا حياتهم اتدمرت بسبب عيادات التجميل غير المرخصة، ومنهم منى اللي حصل لها نخر في الجلد Skin Necrosis في منطقة الخدود بعد ما حقنت فيلرز، وللأسف كانت العيادة مش مرخصة واللي بيحقن لها ماكانش طبيب مؤهل واتسببت الاصابة في تشوه شديد في خدودها بالإضافة للآلم اللي عايشة معاه. وحاليًا ماتزال منى بتخضع لعمليات كتير علشان تقدر تصلح التشوه اللي حصل.
والضحية التانية هي منة اللي ماتت بجلطة في المعدة والرئة بعد عملية شفط دهون أجراها دكتور أسمه مينا جرجس، واللي قالت والدة منة إنه أزال حوالي 36 كيلوجرام من الدهون في العملية، رغم إن اللوائح بتقول إن ماينفعش نشيل أكتر من 5 كيلوجرام في عملية واحدة وإلا المريض هيتعرض لصدمة فسيولوجية خطيرة ممكن تسبب موته.
اتكلمنا مع الدكتور أحمد أبو بكر عن تقرير البي بي سي وقال إنه وللأسف النوع ده من مراكز أو عيادات التجميل غير المرخصة منتشر جدًا في مصر وبتستغل عدم معرفة الناس الكافية باللوائح والقوانين علشان تشتغل، وبيستغل القائمين عليها الفساد الإداري لبعض الأشخاص اللي بيسمح للمؤسسات دي بالعمل.
وعن الطريقة اللي نقدر من خلالها نعرف مدى أهلية المركز والقائم على أي عملية تجميلية قبل ما نعملها قال أبو بكر إنه لازم نسأل كويس عن المكان، وبحثنا ماينفعش يكون من خلال السوشيال ميديا بس، لإن السوشيال ميديا من السهل تزوير سمعة مكان عليها.
وأكد أبو بكر إننا لازم نسأل الطبيب اللي هيعمل لنا أي عملية عن مؤهلاته ونتأكد بنفسنا منها، ولازم نناقش كل خطوة طبية مع الطبيب ونفهم إيه اللي هيحصل فيها والأعراض الجانبية والمخاطر قبل ما نقرر نخضع للعملية دي.
وقال أبو بكر إنه من حق المريض يعرف شخص الطبيب اللي بيعالجه ويعرف مؤهلاته وشهاداته إيه بالظبط وجايه منين، ولازم يكون كل تدخل طبي موثق في أوراق علشان لو المريض له حق يقدر ياخده بعد كده.
وآخر حاجة قالها أبو بكر إننا لازم نتوجه لمراكز وعيادات التجميل المعروفة والكبيرة، وبلاش نجري وراء العمليات الرخيصة لإن بيكون انخفاض سعرها في الغالب نتيجة لإرتفاع نسبة الخطورة والأعراض الجانبية اللي ممكن تنتج من العملية دي.