طبعًا العيد فرحة وأجمل فرحة وجانا العيد أهو جانا العيد وكل حاجة.. بس تعمل إيه لو لقيت إن مطلوب منك تقضي العيد في الشغل؟ أو اتطلب منك حاجات تعملها وأنت في الإجازة؟ ازاي تتخلص من شبح الشغل والتاسكات في العيد؟ احنا هنقولك على شوية نصائح تعملها لو شكيت إنك ممكن تتحط في موقف زيّ ده، وأنت وحظك بقى نفعت معاك أو مانفعتش.
أعمل ميوت لكل جروبات الشغل
هيحصل إيه لو عملنا ميوت لجروبات الشغل سنة ولا اتنين؟ جروبات بتطلع لك من كل حتة، اقفلها يوم إجازتك علشان تعرف تستمتع باليومين اللي حيلتك لإنهم مابيتعوضوش، حتى مش علشان تتجنب أي تاسكات تتحدف عليك، لأ علشان مايتعكننش عليك وتلاقي مديرك فجأة باعت يهزأك على الجروب بدون سبب.. طب ليه كده؟ ده حتى العيد فرحة.
أنا مش ابن الشركة
تاسكات زيادة؟ معلش ما أنت ابن الشركة أنت فاكر نفسك موظف عادي عندنا؟ ده أنت شريك معانا يا راجل عيب عليك. أهو ده اللي بيتسمى “الضحك على الدقون”، علم النفس قال إن دي أكتر جملة توكسيك ممكن تتسمع في بيئة العمل، وعلى أساسها بيتم استغلال الموظف بشغل وتاسكات أكبر من طاقته بدون مقابل.. فلو سمعتها من مديرك وهو عايز يدي لك تاسكات في العيد، قول له “اسكيوز مي.. القطاع الخاص مابيخلفش”.
على قد فلوسكم
وعلى رأي المثل”على قد لحافك مد رجليك” لو مديرك ناوي يطلب منك شغل في العيد بدون مقابل أو فلوس زيادة أو إجازات، أوعى تقبل وقول له أنا بشتغل في حدود الوقت اللي اتفقت عليه من أول يوم شغل، أي شغل برا أوقات العمل الرسمية لازم يبقى له مقابل، وقول له تاني أنا مش ابن الشركة.
بعد العيد إن شاء الله
جملة خفيفة وبتريح، أي حد يطلب تاسك للشغل، أعمل mood on لـ”بعد العيد إن شاء الله”. بعد رمضان أو بعد العيد شعارات بنرفعها لما نتزنق في تاسكات مش عارفين نعملها، وهنرفعه لما يتطلب مننا شغل في العيد.
كتيب لأعذار اللي سبقوك
لما دورنا لقينا إن في أعذار كتير ممكن تتقال، أصحابها استخدموها في مواقف مختلفة، وفي اللي نفع وفي اللي فكس..
- جالي تسمم من أكل الرنجة.
- إيه ده أنا مسافر!
- تقلت في الكحك والبسكوت مش قادر أجي.
- الشوارع في العيد بتبقى فاضية وأنا مش بعرف أسوق غير في الزحمة.
- قميصي اتخرم من البومب والصواريخ في الشارع.
- الثلاثي القاتل: باقتي خلصت .. مش معايا نت في البيت.. مش معايا لاب توب.
ملحوظة: ماتحاولش تمشي على نصايحنا… بس علشان نكون عملنا اللي علينا هنقولك على أخر نصيحة.
ماتسبش حاجة وراك في الشغل قبل العيد
وده الحل الوسط والمثالي لكل الحلول اللي فوق دي، خلص كل شغلك قبل العيد وكل التاسكات اللي عليك في وقتها، وساعتها ماحدش هيقدر يتكلم معاك… بنتمنى لكم إجازة سعيدة بعيدًا عن أي شغل وأي تعديلات.
