لإن ليالي الشتا طويلة وبتجوع كتير، فأنت معظم الوقت بتبقى محتاج حاجة تسليك، وخصوصًا وأنت قاعد سقعان تحت البطانية ومتكلفت وبتشرب السحلب، ومفيش حاجة تسليك وتونسك في الشتا غير الأفلام، بس مش أي أفلام، لأ دي أفلام شتوية لازم تبقى مناسبة لأجواء التكتكة والكسل والهدوء اللي بتبقى فيه، أفلام فيها أجواء وروح الشتاء وفي نفس الوقت فيها جو القعدات الدافية اللي بنحب نقعدها في البيت، أفلام مفيهاش دوشة ولا حركة ولا أكشن كتير، أفلام بسيطة وهادية زيّ هدوء ليل الشتا.
فوتو كوبي
من الأفلام الهادية والرايقة المناسبة جدًا لأجواء الشتا، فيلم يفكرك بأفلام الزمن الجميل اللي كلنا بنحبها، صفية اللي بتلاقي الونس في أغاني الراديو، وأستاذ محمود اللي نفسه في حد يونسه في وحدته ويبقى جانبه قبل ما يموت، المشاهد والحوار مليانة بالدفا، الفيلم من إخراج تامر العشري وبطولة محمود حميدة وشيرين رضا.
رسائل البحر
فيلم بطولة آسر ياسين وبسمة ومن إخراج وتأليف داوود عبد السيد، أحداثه كلها كانت في إسكندرية، والمشاهد المهمة كان بطلها هو البحر والمطر.
حالة حب
فيلم من بطولة هاني سلامة وهند صبري وتامر حسني وزينة، طبيعته رومانسية بس مشاهده المهمة برضه كانت البطل فيها هو المطر ، أول مرة يشوف فيها تامر حسني أخوه بعد سنين أو ذكرياته وهو صغير معاه كانت برضه بتتمحور حولين الشتا.
للإيجار
من الأفلام الحديثة المهمة بس ماخدتش حقها في الترويج أو نزلت في وقت ظلمها، بس على مستوى القصة أو أداء الممثلين أو المشاهد المريحة للأعصاب والعين نقول شكرًا لكل صناع الفيلم، الفيلم بيحكي عن رجل ستيني بيلاقي ونسه إنه يأجر أوضة في شقته لساكن، ويعيش معاه مشاكله وحكاياته ولو لمدة صغيرة، الفيلم اتصور كله في إسكندرية، وكانت من العناصر المهمة والقوية اللي فيه، هو عنصر الصورة لأجمل أماكن وشوارع في إسكندرية والمشي على الكورنيش والقهوة من محطة الرمل وصوت أسمهان، كإنهم كانوا ونيسه الوحيد.
أخر الدنيا
بطولة يوسف الشريف ونيللي كريم، فيه من روح الشتا بأغاني فيروز اللي كانت في شقة سلمى “نيللي كريم” والقهوة اللي كانوا متعودين يشربوها من محطة الرمل.
45 يوم
ممكن يكون الجو بتاع الفيلم مختلف عن الأفلام اللي فاتت، بس الكآبة اللي فيه ممكن تكون مناسبة لبعض الناس اللي دايمًا بتربط الكآبة والغموض بالشتا.