يفرض إيقاع الحياة السريع نفسه على الجميع في الوقت الحالي، وده بيخلي الواحد يحاول يتأقلم معاه خاصة إنك مش هتعرف توقف الزمن لكن أقصى حاجة تقدر تعملها إنك تستمع في حدود المتاح، وده بيوجد حاجات جديدة زي رحلات سفر اليوم الواحد للمصايف بعد ما كانت أسبوع بعدين قلت لبقيت 3 أو 4 أيام وبعدين قلت بقيت ويك إند (جمعة وسبت) لحد ما وصلت إنها ممكن تبقى رحلة صد رد في نفس اليوم منها تفصل وتغير جو وكمان متتكلفش مبالغ كتيرة عشان ميزانية الشهر بتاعك ممتأثرش، فوق كل ده عشان تعرف تنسق الخروج مع أصحاب اللي زيك إجازتهم مش كتير بحكم الشغل أو الارتباطات الأسرية أو الأسباب المختلفة.
سفر سعر مناسب
بداية اتكلمنا مع علي كريش (20) سنة اللي قال لـ “سكوب إمباير” إنه اتفق مع زمايله في الشغل في محل لبيع الملابس بروكسي، إنهم يطلعوا يوم العين السخنة الفرد بـ 500 جنيه بس معلقا: “لاقيت السعر مناسب والسخنة قريبة وأنا مشوفتش بحر من سنة وده يوم الإجازة بتاعي في الشغل وأهو تغيير وبصراحة الميزانية بتاعتي تسمح بيوم نطلع من الفجر الساعة 5 أو 6 كده يعني واتفقنا مع ميكروباص عشان يرجعنا أخر النهار”.
علي بيوضح إنه كان بيطلع قبل كده المصايف مع أسرته بس كان ده كان أسبوع كامل بقى بس حاليا لما دخل الجامعة بقى يفضل يطلع مع أصحابه مرة ومع العائلة مرة بس الاتنين حاجات “تخاطيف” عشان الوقت مس سامح وأهو “انبساطة” على السريع عشان الوقت ضاغط الجميع.
الفكرة مش جديدة
بس فكرة سفر اليوم الواحد مش جديدة لإن لو أنت شوفت فيلم “سمير وشهير وبهير” هتلاقي لما رجعوا آلة الزمن للسبعينات (70) كان في إعلان عن رحلة في الجامعة ليوم واحد لمصيف وبحر عشان برضه الناس كانت عاوزه تغير جو بسعر مناسب، ونفس الكلام استمر في الثمانينات من خلال الرحلات المختلفة بس الرحلات زمان كانت مركزة أكتر على التجمع العائلي أكتر حتى لو يوم واحد وكمان كان السبب هو إن كثير من الآباء شغالين في دول الخليج ومبيصدقوا ينزلوا إجازة مرة في السنة، ونفس الأمر استمر في التسعينات ولو اتفرجت على مسلسل “يوميات ونيس” هتلاقي برضه في حلقة طلعوا رحلة مع بعض لما جزء منهم تاه في الصحرا بس المصايف كانت مختلفة فكانت مركزة على بلطيم وجمصة ورأس البر والعجمي قبل ما يظهر الساحل ومارينا والعين السخنة ومرائيا ومراسي ومؤخرا العلمين الجديدة.
يوم في الساحل ميتنسيش
أما عمرو عادل فقالي إنه بيفضل يطلع يوم الساحل لإن الميزانية بتسمح بيوم بس الصراحة يعني لو هدفع ألفين جنيه أو 3 في يوم واحد فده مناسب ليا وبنطلع يوم واحد نفرغ الطاقة بتاعتنا ونستمتع مع أصحابنا كلنا ونتصور صورة الساحل عشان يبقى عندنا ذكريات في الصيف عشان نشيرها على انستجرام وفيسبوك.
القصة ممكن نضيفلها الترند، اللي طلع من سنتين، لو فاكرين تريند سفر الأسكندرية يوم صد رد بـ 100 جنيه ده؟بس للأسف الـ 100 جنيه كانت قليلة دي أخرك تجيب بيهم لب وشيبسي وتقعد تتفرج على فيلم أو تنزل مع صحابك على القهوة بس في ناس كانت بتحاول تعملها من خلال إنها تقسم السفرية على عدد كبير فالمبلغ يتقسم على كتير، النهارده علشان تخرج في الويك إند زيّ ما هنقولك، حضر مبلغ كده أول ما تقبض وظبط مع صحابك على حاجة هتخليك تضرب عصفورين بحجر، “بادجت” أقل من اللي هتحتاجها لسفرية، وأكتر بشوية من الخروجة العادية، محافظات فيها أنشطة مختلفة ولذيذة تعرف تعملها في يوم واحد مش سفرية طويلة، في محافظات قريبة، من أكل لصيد لاستجمام، تعالى نشوف ممكن تعمل إيه في المحافظات دي.
الأسكندرية
هي تنفع صد رد، بس زيّ ما اتفقنا مش بـ 100 جنيه، الأسكندرية قريبة وتعرف تروح في ساعتين مثلًا، وفيها حاجات كتير جدًا تتفسح فيها مع صحابك أو أهلك، بدل ما تنزل تتفسح هنا في القاهرة، تروحوا تقعدوا على البحر تشموا هوا نضيف، وتفطروا عند محمد أحمد، أشهر محل فول وفلافل هناك أو ممكن تشوفوا عروض الفطار في كافيهات على البحر زيّ You Cafe، وبعدين تتفسحوا في قلعة قايتباي، فسحة مختلفة وهتستمتعوا بيها، وممكن كمان تروحوا مكتبة الأسكندرية، وأكيد ماينفعش تفوتوا التمشية بليل على كوبري ستانلي، ولا هتفوتوا كبدة الفلاح، أو ألبان سويسرا، دي بديهيات.
محافظات القناة
السويس أو الإسماعيلية أو بورسعيد، تقدر تروح أي واحدة منهم في وقت قليل برضه وتتفسح فسحة مختلفة وترجع في نفس اليوم، “يلا نروح ناكل أكلة سمك ونرجع صد رد” أول كلمة هتيجي في بالك لما تسمع اسم المحافظات دي، وفعلًا الموضوع يستاهل إنك تروح المشوار ده، هتاكل أحلى سمك في حياتك وهتروح تنقيه كمان من السوق وهو لسه خارج من المياه، وطبعًا المحلات هناك عندهم كل الوصفات والخلطات السرية لطبخ السمك بطرق كتير، جرب الفسحة دي ومش هتندم، وبرضه هتقعد على البحر وتغير جو، كمان في محافظات بتتميز عن البحر فيها نضيف لإن زوارها عددهم مش كبير.
رشيد
رحلة صيد في مكان جميل وهادي لازم تكون في خطتك للسفر صد رد، رشيد من الأماكن الجميلة والهادية اللي مش معروفة لناس كتير، والمشوار ليها برضه مش بياخد وقت كبير فتقدر تروحها في يوم واحد، وتستمتع برحلة صيد مع أصحابك ويوم هادي ورايق تستجموا فيه وتريحوا أعصابكم من الضغط اللي كان طول الأسبوع.
الفيوم
بمسافة قليلة من القاهرة للفيوم، تقدر تروحها يوم واحد وتتفسح هناك في طبيعة مميزة وجو هيخليك تجدد نشاطك وتغير نفسيتك وترجع للأسبوع الجديد وانت رايق، ممكن هناك تروح وادي الريان، وكمان قرية تونس اللي ليها طبيعة خاصة وفيها صناعة الخزف ممكن تشوفها وتشتري من المنتجات دي.
العين السخنة
رحلة للبحر بسرعة كده صد رد والدنيا ابتدت تبقى حر، روحوا يوم Day use في السخنة تغيروا جو، بسعر أقل أكيد من سفرية كاملة، وفي نفس الوقت هتبقوا اتفسحتوا في السخنة وفي يوم واحد، وبالنسبة للأسعار بتختلف على حسب الأماكن فممكن تختار على حسب ميزانيتك.
دمياط
هتروح تجيب مشبّك صد رد، أكيد أه مش هتفوت إنك تجيب حلويات من هناك علشان يعتبر هناك أصل الحلويات الشرقية دي، لكن برضه فيه حاجات كتير تانية تتعمل في دمياط غير إنك تشتري حلويات، أو عفش وخشب علشان مشهورين بيها، ممكن تروح فسحة في رأس البر، ومش مصيف قديم زيّ الأفيه المعتاد، دلوقتي رأس البر بقت حاجة تانية خالص.
